Shillong, Jylliew 15
Ka Mylliem Block Congress Committee (MBCC) ha ka sngi Saitjaiñ ka la pynkup burom ïa u Ban-lamjingshai Syiem, uba la wanrah nam bad burom ïa ka Constituency bad ka Jylla hi baroh kawei da kaba khur ar tylli ki takma ksiar ha ka 4th National Arm Wrestling & Para Arm Wrestling Champion -ship 2026 kaba la long ha Gujarat.
Ïa kane ka prokram la pynlong ha Mylliem Madan -ïingsyiem ha ïing jong u Banlamjingshai, ha kaba la wan ban sakhi lang da ki nongkitkam jong ka MBCC, ki longkmie ki riew rangbah bad kiwei.
Ïa ka jingïalang la pyn-ïaid da u Bah Kyrshanbor Simon Paswet, General Secretary, Mylliem Block Congress Committee, uba la pynpaw ïa ka jingsngew sarong ïa ka thaiñ halor ka jingjop kaba khraw jong u Banlamjingshai. La sdang ïa ka prokram da ka jingduwai na u Bah Leadstar Kharkongor, Vice Presi-dent, Mylliem Block Cong -ress Committee bad bud sa ka jingpdiang sngewbha ïa baroh kiba la wan sakhi lang.
Ha katei ka jingïalang, la pynkynmaw ïa ka jingïaid lynti jong u Bah Banlamjingshai, uba watla u dei uba duna ha ka bor ïohsngew bad uba ym lah ban kren, hynrei da ka jingïaishah, ka jingminot, ka jingshlur bad ka jingngeit skhem ha U Blei, u la lah ban kynjoh sha ka kyrdan jong ka jingjop ha ka rynsan jingïalehkai jong ka ri.
Kum ka dak jong ka jingithuh bad ka jing-sngewnguh ïa ka jingjop jong u, ka MBCC ka la pynkup burom ïa u da ka jainkup Ryndia bad ka memento.
Haba kren ha katei ka jingïalang, u Bah Lionel Nongkhlaw, President ka Mylliem Block Congress Committee, u la pynpaw ka jingsngewkmen bad sngew sarong kaba khraw halor ka jingjop jong u Banlamjingshai. U la ong ba ka jingjop jong u kam dei tang ka jingjop shimet hynrei ka dei ka jingjop na ka bynta ka Constituency bad ka Jylla hi baroh kawei.
U Bah Lionel u la ong ruh ba wat hapdeng ki jingeh ba u mad ha ka jingim, u Banlamjingshai um shym la ailad ïa kitei ki jingeh ban pynduh mynsiem ïa u, hynrei u la pyni sha ka pyrthei ba ka jingngeit ha U Blei, ka jingïaishah bad ka jingtrei shitom ki lah ban pynurlong ïa ki jingthmu bad ki jingangnud jong u briew.
Na ka liang u Banlamj -ingshai u la pynpaw ïa ka jingsngewnguh kaba khraw ïa ka MBCC kiba la ai burom bad ithuh ïa ka jingtrei shitom jong u. U la ong ba kane ka jingithuh bad jingai mynsiem kan nang pynshlur ïa u ban trei shitom shuh shuh ha ki jingïalehkai ki ban sa wan. U la kyrpad ruh ba kin ai ka jingïarap bad jingïatylli lang khnang ba un lah ban ïoh shim bynta ha ki jingïakob jong ka kyrdan International Championship ha ki sngi ban wan.
