Imphal, Nailur:
Ka Mizoram Pig Farmers’ Association ka la ong ba ka Mizoram kam shym la lah shuh dalade ban kyrshan ha kaba ïadei bad ka jingpynmih ïa ki sniang namar ka jingbun palat jong ka jingïap ki sniang na ka jingwan lynshop jong ka jingpang African Swine Fever bad Porcine Reproductive and Respiratory Syndrome.
Katkum ka jingïathuh jong ka Integrated Sample Survey Report 2023 ba la pynmih da ka Animal Husbandry and Veterinary Department, ha Mizoram la ong ba ka jingbam dohsniang man u bnai ka la long 4,07,145 kilo bad kot sha ka `.16,28,58,000.
Ka Pig Farmers’ Association ka la batai shai ba ha Mizoram ka jingdon jong ki sniang ka shu dap tang ban pynbiang ha ka jylla bad shalan sha kiwei pat ki jylla, hynrei namar ka jingïap jong ki sniang ha ki 10 snem ba la leit, ki nongri sniang ki la ïakynduh ïa shibun ki jingeh na ka jingduhnong kaba khraw.
Ha u snem 2013, ki nongri sniang ha Mizoram ki la duhnong bha na ka jingsaphriang jong ka Porcine Reproductive and Respiratory Syndrome (PRRS).
Kane ka jingpang ka la lynshop biang ha u snem 2016 bad 2018. Wat lada ki la nang don bun ki jaka ri sniang kiba la mih, naduh kane ka por, ka jingsaphriang jong ka jingpang African Swine Fever naduh u snem 2021 ka la wanrah ïa ka jingduhnong kaba khraw. Naduh u bnai Kyllalyngkot jong une u snem ba myta, ka Animal Husbandry and Veterinary Department ka la ïohbuh jingkheiñ ba ki la don kumba 12887 tylli ki sniang kiba la ïap na ka daw jong ka African Swine Fever; bad 22170 tylli kiwei pat ki la shah pynkynriah jaka.
Baroh ka jingduhnong ha kaba ïadei bad kane ka jingwan lynshop jong kine ki jingpang ka la `. 250 klur
