Shillong, Nailur 25
Ka Real Madrid ka la pynliem noh ïa ka Deportivo Alaves da 3-2 kol na ka bynta ban ïoh jingjop ha ka lympung La Liga ha ka Sngi Balang wat hapdeng ka jingshah pynphai kol shwa ban kut ka jingïalehkai.
Kane ka la wan urlong lyngba u Lucas Vazquez, Kylian Mbappe bad u Rodrygo na ka bynta ban pynurlong ïa ka Real Madrid ban ïoh lai point.
Ha kane ka jingïakhun ka Real Madrid ka la ïoh ban thep haduh ar kol ha ka kylla step. ïa kol ba nyngkong la thep ha ka minit kaba nyngkong lyngba u Lucas Vazquez bad u Mbappe ha ka minit kaba 40.
Hadien 3 minit ba la bteng ïa ka jingïakhun jong ka kylla miet, ka Madrid ka la pynbud biang ïa ka kol ka ba lai lyngba u Rodrygo.
Wat la ka Alaves ka la shah thep lai kol, hynrei ka la lah pat ban pynphai kylla ar kol shwa ban kut artad ka jingïalehkai lyngba u Carlos Benavidez (85) bad u Kike Garcia (86). Kine ar kol ki la buh jingma shipor ïa ka Real, hynrei haduh kaba kut jong ka jingïalehkai ka Alaves kam shym la lah shuh ban pynphai bad ka la mad ïa ka jingshah rem
Lyngba kane ka jingjop ka Real Madrid (17 point) kaba dangïai sah ha ka kyrdan ba-ar ka dangduna sa tang shi point ïa ka Barcelona kaba la lamkhmat ha kane ka lympung, katba ka Alaves ka dangïai ha ka kyrdan baphra bad 10 point.
