Shillong, Nailur 25
Ka selection committee jong ka Meghalaya Cricket Association ka la jied ïa 15 ngut ki ‘rang ïalehai ba la san (senior) bad kumjuh ruh 5 ngut kiba la pynap lypa na ka bynta lai tylli ki jingïalehkai jong ka U-23 men’s Col CK Nayudu Trophy 2024-25.
Kane ka lympung ka long ha ka rukom ïalehkai kaba bun sngi bad ka Meghalaya kan pynkhreh ïa ka jingïakhun ba nyngkong pyrshah ïa ka Punjab naduh ka 13 haduh ka 16 tarik u u Risaw. Kane ka kynhun kan ïakhun pyrshah ïa ka Andhra Pradesh (20-23 tarik) bad hadien kata ïa ka Himachal Pradesh (27-30 tarik).
Ka Meghalaya ka la kiew na ka kyrdan sha ‘elite’ hadien ba ka la wan ba-ar ha ka Plate Group kaba la long ha Nagaland ha u snem 2023-24. Ka Meghalaya ka la jop lut ïa baroh 6 tylli ki jingïakhun ha ka lynti jong ka ban ïakhun ïa ka nam lahduh, hynrei kam shym la lah satia ban pynliem ïa ka Nagaland ha ka phainal.
Mynta ka samoi ki khynnah jong ka Meghalaya kin don ïa ki nongïalehkai kiba kham heh ban ïakhun bad thikna ba kin ïoh jinghikai shibun da kaba ïakhun pyrshah ïa kitei ki kynhun ba pawkhmat.
Ka Meghalaya ka dangdon ha ka jingpynkhreh ha Bengaluru ha kaba kin mih ban leit sha katei ka lympung ha ka 10 tarik u Risaw.
Ki rangïalehkai ka Jylla na ka bynta kitei ki lai tylli ki jingïakhun ki long u Kevin S Christopher, Manish Sharma, Aman Kumar, Avinash Rai, Abhishek Kumar, Gulgul Sangma, Gavineal J Marpna, Bipin Kr Ray, Josiah Momin, Joydeepan Deb, Navin Kumar, Purav Agarwal, PM Santhosh, Sachin Kumar bad u Swastic Chettri. Katba kiwei pat kiba la pynap lypa ki long u Thunun Marak, Kush Agarwal, Rohit Kr Yadav, Bharat Gurung & Raghav Magotra
Ki coach ki kynthup ïa u Neetesh Sharma (Head Coach), Synrapsing Riahtam (Assistant Coach), Emidao Dhar (Physio), Skhembor Khongbtep (Trainer) bad u Chuba R Marak (Manager).
