Shillong, Nailur 25
Ar ngut ki khynnah ïalehkai athletics ka Jylla, u Kyrshanlang Shylla bad u Renaldi Dhar kin pynkhreh ban leit ïashim bynta ha ka lympung ïalehkai 4th Indian Open U-23 Athletics Championship 2024 ka ban sdang naduh 28 haduh 30 tarik mynta u bnai ha Patna kaba ha Bihar.
U Kyrshanlang ba dang 20 snem ka rta un pynkhreh ban ïashim bynta ha ka 400 mitar, katba u Renaldi ba dang 18 snem ka rta un shim bynta ha ka jingïakop mareh kaba 100 mitar.
Kumba ka paw u Kyrshanlang uba dei na ka shnong Kyndong Tuber kaba ha West Jaiñtia Hills, u dangdon ha ka jingshah pyntbit ha ka shlem ai jinghikai jong ka SAI Training Centre, Shillong. Katba u Renaldi uba na ka Wahïajer kaba ha West Jaiñtia Hills, u dangdon ha ka shah pyntbit jong ka Super Elite Pathway Program kaba ha kane ka nongbah.
Lah ban kdew ba baroh ar ngut kitei ki khynnah ki dei kiba la khur takma ha ka 3rd North Games 2024 kaba la long ha Nagaland bad kiba la khur ar tylli ki takma ksiar ha ka 5th Meghalaya Games 2024 kaba la long ha Tura.
