Bengaluru, Nailur:
Kum ka jingpynrem ïa u Myntri Rangbah ka jylla u Siddaramaiah, ka Karnataka High Court ha ka Sngi Balang ka la weng noh ïa ka jingujor jong u kaba pynibor pyrshah halor ka jingmynjur jong u Lat ban pynlong ïa ka jingtohkit pyrshah ïa u ha ka mukotduma jong ka jingmang jaka, la ïathuh ka tyllong khubor.
Ka khubor ka la ïathuh ba u Myntri Rangbah jong ka jylla u la pynibor ïa ka jingmynjur jong u Lat ka Jylla Karnataka, u Thaawarchand Gehlot, ban pynlong ïa ka jingtohkit pyrshah ïa u, ha kaba ïadei bad ka jingkynnoh ba don ki jingleh bymhok ha ka jingai jong ka Mysuru Urban Development Authority (MUDA) ïa ki 14 tylli jaka sha ka kurim jong u, ha ka jaka kaba kham paw paidbah.
Ka kynhun nongbishar bamarwei jong u Justice M Nagaprasanna ka la pynkut ha ka jingbishar ïa ki dorkhas ha ki hynriew tylli ki jingïalang kaba la sdang naduh ka 19 tarik u Nailar bad 12 tarik u Nailur.
Shuh shuh, ka la pynjlan ha ka ban ai ïa ka rai shipor jong ka naduh ka 19 tarik u Nailar kaba la bthah ïa ka iingbishar ba kyrpang na ka bynta ki nongmihkhmat paidbah, kaba la buh ban bishar halor ka jingkynnoh pyrshah ïa u ha katei ka mukotduma, ba kan buh por noh ïa ki kam jong ka, haduh ban da pynbeit ïa ka jingujor.
“Ki jingshisha kiba la ïathuh ha ka dorkhas khlem artatien kin donkam ïa ka jingtohkit, ha ki bniat jong ka jingshisha ba u nongïoh jingmyntoi na kine ki kam baroh um dei ban long uba nabar hynrei ka longïing jong u nongmudui. Ka dorkhas ka ïeng beit,” la rai u Justice Nagaprasanna, kumba la ïathuh da ka tyllong khubor.
U la ong, “Ka hukum ba shipor jong kano kano ka jait kaba dang im mynta kan ïeng beit.”
U Lat ha ka 16 tarik, Nailar u la ai ïa ka jingpynshitom katkum ka kyndon 17A jong ka Prevention of Corruption Act, 1988 bad ka kyndon 218 jong ka Bharatiya Nagarik Suraksha Sanhita, 2023 lane ka jing-leh ïa ki kam runar ba la kynnoh ba la kdew ha ki dorkhas ba la ai sha u da ki nongmudui u Praep P Kude, T J Abraham bad u Snehamayi Krishna.
Ha ka 19 tarik, Nailar, u Siddaramaiah u la leit sha ka High Court ban tuklar ïa ka jinglong aiñ jong ka hukum jong u Lat ka jylla.
Ka tyllong khubor ka la ïathuh shuh shuh, ha ka dorkhas, u Siddaramaiah, u la pynpaw ba ïa katei ka hukum pynjari la pynmih khlem da pyndonkam ïa ka jingmut jingpyrkhat, kaba pynkheiñ ïa ki jingbthah jong ka aiñ, bad kaba pyrshah ïa ki nongrim jong ka Riti synshar ka ri, kynthup ïa ka jingai jingmut jong ka kynhun Myntri, kaba treikam hapoh ka Article 163 jong ka Constitution of India.
U Siddaramaiah u la dawa ban pynkylla noh ïa ka rai jong u Lat, da kaba kynthoh ba u Lat u la shim ïa ka rai kaba be-aiñ kaba ym lah ban pynneh pynsah katkum ka aiñ, kaba bakla ha ka rukom treikam, bad kaba la pynlong da ki jingpyrkhat kiba nabar.
Ki Senior Advocate u Maninder Singh, u Prabhuling K Navadgi, ka Lakshmi Iyengar, u Ranganath Reddy, bad u K G Raghavan, nalor kiwei pat, ki la ai jingmut na ka bynta ki nongmudui kiba la pan ïa ka jingpynshitom ban tohkit pyrshah ïa u Siddaramaiah.
