Shillong, Nailur 26
Ka lympung ïalehkai Second Division Football League 2024 ba la pynïaid da ka Shillong Sports Association ka la nangjam shaphrang ha kaba ka Lumshyiap SC bad ka Nongkrem SC ki la ïoh jingjop ha ka Sngi Palei.
Ha kane ka jingïakhun kaba la long ha SSA Stadium First Ground, Polo, ka Lumshyiap ka la pynliem noh ïa ka Laitlyngkot SC da 1-0 kol. Kane ka la wan urlong lyngba u Pynskhemlang Syiemleh uba la ïoh ban thep ha ka minit kaba 40.
Haba phai sha kawei pat ka jingïakhun kaba ar, ka Nongkrem ka la pynliem noh ïa ka Marbisu SC da 4-0 kol. U Willbert Marbaniang u la khur syndon da ka hat-trick hadien ba u la ïoh ban thep lai kol ha ka minit kaba 18, 21 & 57 bad ïa kawei pat la thep da u Jefferson Pakynteiñ (77).
Ka jingïalehkai ha ka Sngi Thohdieng kan long hapdeng ka Imson SC pyrshah ïa ka Smit SC ha ka por 12 baje, katba ka Umphrup SC ïa ka Laitkyrhong SC ha ka por 3 baje janmiet.
