Shillong, Nailur 27
Wat la ka dei ka sien kaba nyngkong eh ïa u rangïakura ka Jylla, u Shanborlang Marbaniang ban leit ïashim bynta shabar ri, pynban u la lah ban pynpaw ïa ka jingtbit ha shwa ba un shah rem noh ha ka rynsan ïakura jong ka ‘Rise of Champions’ kaba la long ha Bangkok kaba ha Thailand.
Utei u rangïakura uba na Laimer; Upper Shillong u la shah rem noh ha ka wat kaba khyndai ha u Jayson Paden Vayson na Philippi ha ka Light Flyweight Bout kaba don haduh 10 tylli ki wat jingïakhun kaba la long ha ka 26 tarik u Nailur 2024.
Kane ka long ka sien kaba nyngkong eh ba u Shanborlang un ïakhun haduh 10 tylli ki wat jingïakhun kaba don haduh 30 minit. Kumta la hap ban pynsangeh noh ha ka wat kaba khyndai hadien ba u Shanborlang um lah shuh ban bteng ïa ka jingïakhun namar ka jingthait palat ka met bad u Jason u la ïoh ban pdiang ïa ka belt jong ka ABF Flyweight Champion.
Kumba ka paw u Jayson u dei u rangïakura uba bat ïa ka kyrdan ba 18 ha ka pyrthei. U la jop 13 sien, ïakhaid shisien bad shah rem shisien, katba u Shanborlang u la jop san sien, ïakhaid ar sien bad shah rem ar sien.
