Raipur, Nailur:
Ha ka jingjop kaba khraw, ki bor pahara san sngi hadien jong ka jingtrei shitom ki la lah ban pynliem ïa lai ngut ki heh nongïalam jong ki lehnoh Maoist ha ki khlaw Paradi jong ka Abujhmad, ha Narayanpur distrik, kaba jngai kumba 400 km na ka bynta ba shaphang Shathie ka Raipur.
Ka jingleit khynra bad leit thwet lehnoh, kaba la sdang naduh ka 22 tarik, Nailur, ka dei kaba la pynlong hapoh ka jingpyntreikam ban ïakhun pyrshah ïa ki Maoist ba la tip kum ka “Maad Bachao”.
Ka Abujhmaad kaba don ha markhap bad ka Narayanpur kaba don ha ka bynta ba shaphang Shathie jong ka Chhattisgarh ka dei ka jaka lum (Abujh) kaba ym lah ban tip (Maad) bad lah ban ïohi ba ka dei kawei na ki jaka ba la shah ktah jur bha ha ki kam pyntriem bad kam thombor jong ki Maoist.
Katkum ka jingïathuh jong ki pulit ka Bastar, la ong ba kine ki lai ngut kiba la shah pynïap ki dei kiba la tip kyrteng kum u Rupesh jong ka Dandakaranya Special Zonal Committee (DKSZC) uba la shah thong da `25 lak ha ka khlieh jong u lada ïohkem ne lah ban ai jingtip shaphang jong u.
Nalor jong u, ki arngut kiwei pat kiba kynthup ïa u Jagdish uba dei u dkhot jong ka South Bastar Divisional Committee (DVCM) bad kawei pat ka dei ka riewkynthei ïa kaba la tip kyrteng kum ka Sarita bad ruh da ka kyrteng kum ka Basanti na ka kynhun lehnoh Maoist kaba 10, kine ki la shah thong ha ka khlieh jong ki da `. 16 lak bad `.8 lak.
U Rupesh, u la shah mudui halor kiba bun ki kam runar ha kaba kine ki la long halor 66 tylli ki jingjia, kiba kynthup ka kam pyntriem kaba la jia ha u snem 2009 ha Madanwada (Rajnandgaon) ha kaba ki la don kumba 29 ngut ki shipai ki la shah pynïap. U Jagdish, u la don 43 tylli ki mukotduma ïa kiba la mudui pyrshah ïa u.
