Shillong, Nailur 29
Ka Mawryngkneng SC bad ka Umpling SC ki la jam sha ka final ha ka lympung ïalehkai Third Division Football League 2024 ba la pynïaid da ka Shillong Sports Associa-tion hadien ba ki ïoh jingjop ha ka Sngi Saitjaiñ ha SSA Stadium kaba ha Polo.
Ha ka jingiakhun semi final kaba nyngkong, ka Mawryngkneng SC ka la pynliem noh ïa ka Mawpat SC da 2-0 kol. Kane ka la wan urlong lyngba u Sanlangki Marboh bad u Banker Mynsong.
Wat la kine ki kynhun kim shym la lah ban thep kol ha ka kylla step, hynrei ka Mawryngkneng ka la ïoh ban pynkhih jar ha ka kylla miet lyngba u Sanlangki Marboh ha ka minit kaba 50. Kane ka kynhun ka la pynbud biang ïa ka kol kaba ar lyngba u Banker Mynsong ha ka minit kaba 78.
Haba phai sha kawei pat ka jingïakhun kaba ar, ka Umpling SC ka la jop da 2-1 kol ïa ka Tynring SC bad kane ka la wan urlong lyngba u Bebankitdor Nongkynrih.
Ha kane ka jingïakhun ka Tynring ka la ïoh ban pynkhih jar nyngkong eh lyngba u Tyngshaiñbor Ryntong ha ka minit kaba 26. Hadien shiteng kynta ka Umpling ka la lah ban pynïakhaid kylla lyngba u Tonas Nongbri ha ka minit kaba 31.
Wat la kine ki kynhun kim shym la lah ban thep kol haduh kaba kut ka jingïalehkai, hynrei u Bebankitdor u la lah ban pynurlong na ka bynta ban thep ïa ka kol kaba ar na ka bynta ka Tynring ha ka extra time kata ha ka minit kaba 100 bad ban khur syndon ia ka jingjop.
Kumba ka paw kitei ki ar tylli ki kynhun ki la ïoh ban bat ïa ki kyrdan ba hakhlieh duh ha ki jingïalehkai group ha kaba ka Umpling ka la ïoh ban bat ha ka Group-C bad ka Tynring ha ka Group-D.
Ha ka jingïakhun quarter final, ka Umpling ka la pynliem ïa ka Sanmer SC lyngba ka tie-breaker, katba ka Tynring ka la pynliem ïa ka Mawkriah West SC.
Kumta ka Mawryngkneng SC bad ka Umpling ki la jam sha ka Second Division ban ïashim bynta naduh ka aïom jong u snem 2025.
Ka jingïalehkai jong ka Second Division ha ka Lah Sngi U Blei kan long hapdeng ka Mylliem Lum pyrshah ïa ka Laitlyngkot SC ha ka por 12 baje, katba ka PFR FA ïa ka Jongksha SC ha ka por 3 baje janmiet.
