Khliehriat, Nailur 29
Ka Sutnga Mission bad Musniang SC kin pynkhreh ban ïaknieh ïa ka nam lahduh jong ka lympung ïalehkai 2nd Division Football Tournament ba la pynïaid da ka East Jaiñtia Hills District Football Association (EJHDFA).
Kane ka jinglah ban pynthikna ka la wan hadien ba baroh ar tylli ki kynhun ki la jop ha ki ar tylli ki jingïalehkai semi final kaba la long ha madan Artificial Turf Deinshynrum, Khliehriat ha ka Sngi Saitjaiñ.
Ha ka jingïakhun semi final kaba nyngkong, ka Sutnga Mission SSCC ka la pynliem noh ïa ka Ladrymbai Dongwah SC da 3-0. Ïa kine la thep da u Wellson Pala ha ka minit 8, kumjuh u Lebor Bamon ha ka minit ba 49 bad u Moses Swer (Senior player) ha ka minit kaba 66.
Haba phai sha kawei pat ka jingïakhun, ka Musniang SC ka la pynliem ïa ka Rymbai Madanpynriang SC da 2-0 kol. Ïa kine la thep da u Nikerda Dkhar ha ka minit kaba 3 bad u Heimonmiki Dkhar (73).
