New Delhi, Nailur:
U nongïalam jong ka seng BJP u NR Ramesh u la buh da ka jingujor ha Karnataka Lokayukta pyrshah ïa u President ka seng Congress u Mallikarjun Kharge bad ïa kiba bun bahaïing-bahasem jong u, da kaba kynnoh ba ki la donkti ha ka kam bamsap lyngba ka skhim kaba la bun bha.
Ki jingkynnoh ki kynthup halor ka jingleh thok, ka jingwanrah ïa ki sakhi thok lyngba ki kot ki sla, ka jingïasuhbuit sniew ban ïoh ïa ka jaka sorkar, bad ka jingsla, ka jingthmu ban shim beain ïa ka jaka sorkar, bad ka jingkurup beaiñ da kaba suk ïa ka jingdon jongem jong ki riewpaidbah.
Ka jingujor ka la kynnoh ruh ïa u Kharge bad kiwei kiwei ba ki la bhah bad mang ïa ki jingdon-jingem jong ka sorkar, ha kaba kane ka la wanrah ka jingsngewkhia halor ka jingmynjur ban ai jaka halor ka rukom kaba pynmih ïa shibun ki jingkylli.
Kawei na ki jingpynshisha ba hakhmat eh halor ka jingshah kynnoh donkti ka long ka jingmang ïa san tylli ki jaka sha ka Siddharth Vihar Trust, kaba don ka jingïadei bad ka longïing jong u Kharge.
Ki briew kiba la shah thad kyrteng ha kane jingmudui ki kynthup ïa u Mallikarjun Kharge, u Myntri ka Karnataka u Priyank M Kharge, u Rahul M Kharge, u Radhabai M Kharge, u Radhakrishna, u Myntri ka Karnataka u MB Patil, bad u IAS ophisar u Dr S Selvakumar.
Une u nongïalam ka BJP u la aiti ïa ki kot ki sla kaba 394 sla kum ki sakhi ban kyrshan halor ki jingmudui jong u. Katkum ka jingujor, ar tylli ki kynhun jong ka sorkar ki la bhah ïa ki jingdon jingem sha ka Siddharth Vihar Trust.
Ha u snem 2014, ka jaka kaba heh da kumba 8,002 phut sawdong ka la shah bhah sha ka Siddharth Vihar Trust.
Ha u snem 2014, ka jaka kaba heh da kumba 8,002 phut sawdong ka CA plot, kaba don ïa ka Site Number 05 ha ka BTM 4th Stage jong ka Bengaluru, la kynnoh ba la ai lyngba ka Bangalore Development Authority (BDA).
Shuh shuh nalor kane, ha ka 30 tarik, Jymmang, 2024, ïa ka jaka kaba heh da 5 akar kaba don ha ka Hardware Sector jong ka Hi-Tech Defence and Aerospace Park ha Bagalur la bhah sha u Rahul M Kharge da ka Karnataka Industrial Areas Development Board (KIADB).
U Ramesh u la kynnoh ba kitei ki jingai jaka ki dei ki bym shym la lah ban pdiang bad namar kane ka daw la dawa ba la dei ban pynlong da ka jingtohkit kaba bniah ïa kito kiba la paw kyrteng ha ka jingmudui.
