Guwahati, Nailur:
Ki pulit jong ka Assam ki la ïoh ban kem ïa saw ngut ki nong Bangladesh ha ka step jong ka Sngi U Blei, naba ki la shah kynnoh ba ki la wan rung beaiñ sha India lyngba ka Karimganj distrik. Da ka jingpyntreikam basted jong ki pulit ka la pynlong ban pynphai biang noh kloi ïa kine ki nong Bangladesh sha ka jaka ba ki wan, la pynshisha da u Myntri Rangbah jong ka jylla u Himanta Biswa Sarma ha ka jingphah khubor lyngba ka rynsan phah khubor ha ka X.
U Sarma u la ai ka jingïaroh kaba kyrpang na ka bynta ki pulit jong ka jylla, kiba la lah ban khmih bniah bad wanrah ïa ka jingshngaiñ ha ki bynta khappud. Kane ka long shi bynta jong ka jingpyntreikam ki heh pulit jong ka Assam khnang ban lah tehlakam bad khanglad ïa ka jingwan rung beaiñ jong ki bar ri.
Kumba la ïathuh ki heh pulit, la ong ba ki la don kumba 100 ngut ki briew kiba la shahkem bad shah pynphai biang ha kine ki por ba la leit, hadien ba ki la mih ki jingjia jong ki jingïakynad ha Bangladesh la sakhi ba ki la don bun ki nongshong shnong kiba la phet sha ki ri ba marjan da kaba ïaid lyngba ki khappud da ka lynti kaba beaiñ.
