Shillong, Nailur 30
Ka Arunachal Pradesh bad ka Meghalaya ki la ïasam mar shi point ha kaba sdang jong ka 1st Senior Women’s Interstate Friendship T20 Tournament hadien ba ki la poi sha ka jingïakhaid, katba ka Nagaland ka la pynliem ïa ka Mizoram da 5 wiket ha ka Lah Sngi U Blei ha madan ïalehkai Pahamsning kaba ha Ri-Bhoi.
Ïa kane ka lympung ïalehkai la pynïaid da ka North East Cricket Development Council (NECDC) kaba la kynthup lang haduh hynriew tylli ki jylla jong ka thaiñ shatei lammihngi, kita ka Arunachal Pradesh, Manipur, Meghalaya, Mizoram, Nagaland bad ka Sikkim.
Kane ka lympung ka long ruh shi bynta ban pynkhreh ïa ki lympung ïalehkai jong ka BCCI na ka bynta u snem 2024-25. Kumta ha kane ka sngi la pyni ïa ka trophy ha ryngkat ka jingïadon lang ki ‘thei ïalehkai, ki bor ba dei khmih jong ki kynhun ïalehkai lem bad ki nongpynïaid ka NECDC ryngkat ka Meghalaya Cricket Association bad ka Ri-Bhoi District Cricket Association nalor kiwei pat.
Haba phai pat sha ka jingïakhun Group-A, ka Arunachal ka la jop ïa ka kynting pisa bad ka la kam trai ban tied nyngkong. Na ka liang ki nongkawang bol ka Meghalaya, ka kapten ka Debasmita Dutta (4/10 ha ki 4 over) bad ka Ruby Chettri (3/13 ha ki 4 over) ki la ïalehkai bha bad pynlong ïa ka Arunachal ban tied tang 78 run bad shah pynkhyllem 9 wiket ha ki 20 over.
Wat kata ruh ka long lehse kaba kham bun ban ïa kaba ki dei ban ïoh hadien ba ki kynjoh sha ki 30/6, hynrei ka jingnoh synñiang kaba 17 run lyngba ka Sardam Ligu (not out) bad 19 run na ka Nabam ka la ïarap ïa ka Arunachal.
Haba wan beh ïa ka thong, ka Meghalaya ka la hap ban shaniah tylli ha ka Monica Lyngdoh Phawa, kaba la lah ban ïalehkai bha. Kane ka nongtied ka la ïoh ban tied 37 run na ki 65 bol, da kaba khyrwit hynriew tylli ki ‘four’. Hynrei ha kaba kut ka Meghalaya ka la kamai 78 run bad shah pynkhyllem 8 wiket ha ki 20 over, kaba long mar katjuh bad ka Arunachal. Ïa ka nam Player of the Match la khur da ka Debasmita.
Ha kawei pat ka jingïakhun kaba ar, ka Mizoram ka la jop ïa ka jingïakynting pisa ha ka Group-B pyrshah ïa ka Nagaland bad ka la jied ban tied nyngkong, hynrei ka la kamai tang 61 run hadien ba ka la shah pynkhyllem baroh ki nongtied ha ki 19.3 over. Ki la don tang ar ngut kiba la lah ban ïalehkai bha kata ka Felfeli Pautu (15) bad ka Miriam L. Hrahse (13), katba ka Elina Muru (2/7 ha ki 4 over) bad ka Limatola Ao (2/9 ha ki 4 over) ki la lah ban pynhap wikwet na ka bynta ka Nagaland.
Haba wan shimti ïa ka pali kaba ar, ka Alemienla ka la lah ban tried 30 ron na ka bynta ban pynlong ïa ka Nagaland ban kynjoh sha ka thong da kaba kamai 62 run bad shah pynhap 5 wiket ha ki 12.2 over.
Ka jingïakhun ha ka sngi Ba-ar kan long hapdeng ka Manipur pyrshah ïa ka Arunachal ha ka Group-A naduh ka por 9 baje mynstep bad bud sa ka Sikkim pyrshah ïa ka Nagaland ha ka Group-B naduh ka por 12:30 mynsngi.
