Shillong, Risaw 01
Ka Meghalaya State Kick-boxing Association ka la pynbna ba ka ‘thei ïakura ka Jylla ka Daniella I.W Mylliemngap kan mihkhmat ïa ka ri India sha ka Asian Kickboxing Cham-pionship 2024 ka ban long ha Cambodia naduh ka 6 haduh 13 tarik u Risaw myna u snem.
Ïa kane ka lympung ïalehkai yn pynlong hapoh ka jingkhmih jong ka Asian Kickboxing Confederation bad ka World Association of Kickboxing Organisations (WAKO IF).
Ka Daniella kan ïasoh lang bad ka kynhun ïalehkai jong ka WAKO India Kickboxing Federation Indian ha ka 4 tarik u Risaw shwa ba kan leit sha Cambodia. Kane ka lympung ka long ruh ban ïoh rung sha ka World Games kaba la thmu ban long ha China ha u snem 2025.
Kumta ka Meghalaya State Kickboxing Association ka la ai khublei kitbok-kitrwiang ïa ka Daniella bad ka kyrmen ba kan lah ban ïalehkai bha na ka bynta ban ïoh jingjop bad ruh ban ïoh rung sha ka World Games. Ha kajuh ka por ka MSKA kaba la seng ha u snem 2017 ka la pynpaw ka jingsngewnguh ïa baroh ki nongshim bynta bad ki nongkyrshan khamtam ïa u Myntri Rangbah ka Jylla bad u Myntri ka tnat ïalehkai kiba la lah ban pynurlong na ka bynta ka ka Daniella ban poi sha katei ka kyrdan ïalehkai.
