New Delhi, Risaw:
U Nongïalam ka Aam Aadmi Party (AAP), u Arvind Kejriwal ha ka Sngi U Blei u la kob ïa u Myntri Rangbahduh ka Ri u Narendra Modi, ba un pynbiang ïa ka bording khlem jingsiew ha ki jylla ba synshar da ka NDA, ha shwa ka ilekshon sha ka ïingdorbar thawaiñ jong ka Delhi, ha kaba u la kular ba un ïalap ilekshon na ka bynta ka BJP, lada u pyndep ïa katei ka jingdawa.
“Nga kob ïa u Modi ban pynbiang bording khlem jingsiew ha baroh 22 tylli ki jylla ba la synshar da ka BJP shwa ka ilekshon sha ka ïingdorbar thawaiñ jong ka Delhi ha u bnai Rymphang. Lada u leh kumta, ngan ïalap ilekshon na ka bynta ka BJP,” la pynskhem u Kejriwal haba kren ha ka jingïalang paidbah ha Delhi.
Haba jer kyrteng ïa ki skhim jingïarap kum ka jingpynbiang bos khlem jingsiew na ka bynta ki kynthei, ka jingleit jingwan jong ki tymmen ba la sdang da ka sorkar jong u na ka bynta ki paidbah ka nongbah Delhi, u Kejriwal u la ong ba ka BJP ka kwah ban pynduh noh ïa ki.
“Ngi la ai hynriew tylli ki jingmyntoi bad jingkylla sha ka Delhi: ka bording, ka um, ka leit ka wan da ki bos na ka bynta ki kynthei, ka jingleit riewblei jong ki tymmen, ka koit ka khiah, ka pule puthi; ka BJP ka kwah ban pynduh noh ïa ki,” u la ong.
U Kejriwal u la ong ba ki Sorkar Double Engine jong ka BJP shen kin sa khyllem noh bad ha kaba u la kynnoh ruh ba ki sorkar ‘double engine’ jong ka BJP ba ki “lute arsien bad bamsap arsien”. “Ki sorkar kiba don ar tylli ki engine ki mut ka jingkiew dor, ka jingbamsap bad ka jingbym don kam don jam,” u la ong.
U Kejriwal u la ïathuh lypa ba ka BJP kan sa shah kynjat na Haryana bad Jammu and Kashmir.
“Haba nga peit TV hynnin ka janmiet, ki jingïathuh lypa ki la sdang wan. Ki sorkar ‘double engine’ jong ka BJP kin sa shah kynjat na Haryana bad Jammu and Kashmir. Kane ka ‘double engine’ ka la pulom hapoh ka ri. Ka engine kaba nyngkong ka la sniew ha u bnai Jylliew haba ki la ïoh tang 240 ngut ki MP. Ka engine kaba ar ruh kan sa pulom na Jharkhand bad Maharashtra suki-suki. Ki paidbah ki la sngewthuh ba ka sorkar ‘double engine’ ka mut ka jingkiew dor, ka jingkyrduh kam bad ka bamsap,” u la ong haba kren ha ka jingïalang ‘Janta Ki Adalat’. U Kejriwal u la kynthoh shuh shuh ïa ka BJP ba ka long kaba pyrshah ïa ki baduk, da kaba kdew ïa ka jingweng kam ïa ki ‘bus marshal’ bad ki nongpynïaid ïa ki ‘data entry’ nalor ka jingpynsangeh ïa ka tulop jong ki homeguards ha Delhi.
“Kam don ka synshar paidbah ha Delhi. Ka don hapoh ka jingsynshar jong u LG,” u la kynnoh.
