Lucknow, Risaw:
U Myntri Rangbah jong ka Uttar Pradesh u Yogi Adityanath, u la bthah ïa ki heh pulit, ba kin khanglad bad ban khmih bniah halor ki jingpynwit ne ki tiar ba sah ne hap ha ki lynti rel.
Ïa kane ka jingbthah la pynmih ha ka por ba la don ka jingïalang bad ki ophisar ha ka kyrdan ADG, ha kaba la pynpaw ïa ka jingsngewkhia halor ki jingjia ba dang shen kiba ïadei bad ki jingdon jong ki tyndong lyer, nar rod, bad kiwei kiwei ki tiar kiba don hapoh ki lynti rel, kumjuh ruh ki maw ïa kiba la kawang ïa ki rel.
U Myntri Rangbah u la ban jur ïa ka jingdonkam ban ïatreilang hapdeng ka GRP, RPF, ka bor pynïaid rel, bad ki pulit ban ïaleh pyrshah ïa kane ka kam.
Ha kaba ïadei bad kane, la ai jingmut ruh ban pynkhlaiñ ïa ki kynhun wadbniah ha ka thaiñ ban ïada na kum kine ki jingjia. Kine ki jingbthah ki long hadien ba la mih ki kaiphot halor ki jingjia kiba kum kine ha ki distrik kum ka Kanpur, Rampur, Mahoba, bad Farrukhabad ha kine ki bnai ba la leit.
U Adityanath u la pynbna ruh ïa ka E-pension system bad ban jur ïa ka jingdonkam ban bud ïa ki por ba la buh ban kyntiew kyrdan ïa ki pulit.
U la pynpaw ïa ka jingdonkam ban buh ïa ki jingthoh kiba thikna bad ban thung ïa ki ophisar katkum ka jingtbit jong ki.
Ka jingpynthikna ban siew ïa ka bai shongthait ha ka por kaba biang ka long kawei pat ka mat ba kongsan ba la ïakren.
U Myntri Rangbah u la batai ïa ki katto katne ki jingbthah kiba thmu ban pynbha ïa ka jingïatreilang bad ka jingai jingtip hapoh ka kynhun shipai.
U la kyntu ïa ki ophisar kiba don ha ka kyrdan ADG ban pynlong ïa ka jingleit jngoh ïa ki distrik man ka por ban bishar bniah ïa ki kam bad ban pyntreikam ïa ki jingpynbha kiba donkam.
“Ki ophisar ha ka kyrdan ADG ki dei ban leit man ka por sha ki distrik ban bishar bniah ïa ki kam bad ban pynbha,” u la ong.
Kine ki sienjam ki long shi bynta jong ka jingpyrshang ban trei shitom khnang ban kyntiew ïa ka jingtreikam jong ki pulit ha Uttar Pradesh. Da kaba pynbeit ïa baroh ar ki jingeh ha ka jingtreikam bad ki mat ba ïadei bad ki pulit, ka jylla ka pynthikna ïa ka jingtreikam ki aiñ ha kaba la ong ba kane kan jin dala bha bad buh jingshngaiñ ïa ki paidbah.
