Shillong, Risaw 10
Ka lympung ïalehkai Meghalaya Youth League 2024 ba la pynïaid da ka Meghalaya Football Association kan poi noh sha kaba kut ha ka Sngi Thohdieng ha kaba ki kynhun ïalehkai jong ka Under-14 bad Under-16 kin pynkhreh ban ïaknieh ïa ka nam lahduh ha SSA Stadium kaba ha First Ground, Polo
Ki kynhun ki ban ïakhun final ha ka Under-14 kin long hapdeng ka West Jaiñtia District Sports Association pyrshah ïa ka Nongstoiñ District Sports Association ha ka por 11 baje mynstep, katba ha ka Under-16 kin long hapdeng ka Shillong Sports Association pyrshah ia ka Ri-Bhoi District Sports Association ha ka por 2 baje janmiet.
Ka West Jaiñtia ka dei ka kynhun kaba la lah ban pynpaw ïa ka jingtbit ha ka Zone-B ha ka Under-14, ha kaba ka la jop ha baroh 8 tylli ki jingïalehkai shwa ba kan pynliem ïa ka Pyndengumïong District Sports Association ha ka quarter-final lyngba ka tie-breaker bad ruh ka la lah ban pynliem sa ïa ka Shillong SA ha ka semi-final kaba la long ha Sngi Balang.
Ka Nongstoiñ ka la jan mar katjuh ha ka rukom ïalehkai ha ka Zone-D (U-14), ha kaba ka la jop hynriew sien, ïakhaid arsien bad shah rem shisien na ki 10 sien ïakhun. Nangta ka la jop ïa ka Amlarem Block Sports Association ha ka quarter final da 3-2 kol ha ka extra-time. Ha ka sngi Balang, ka la lah ban pynliem ïa ka Ri-Bhoi DSA da 1-0 kol ha ka semi final.
Ha ka U-16, ka Shillong SA bad ka Ri-Bhoi DSA ki la ïakynduh ha ka ’round robin league’ namar baroh ki la don ha ka Zone-C. Ka Ri-Bhoi ka la wan ha khlieh duh ha kane ka zone da kaba kamai da 20 point, katba ka SSA ka la kamai 19 point. Hynrei haba ki la ïakynduh pyrshah ka Ri Bhoi ka la jop da 3-2 kol ïa ka SSA.
Kumta la khmih lynti ba kine ki kynhun kin pynkhreh ban ïakhun tyngeh na ka bynta ban ïaknieh ïa ka nam lahduh.
Na ka liang ka synjuk ka la wer ia ki paidbah riew ieit phutbol ba kin wan ban sakhi ia kine ki jingiakhun final bad ym donkam ban siew bai rung.
