Shillong, Risaw 11
Ka Meghalaya Youth League 2024 kaba nyngkong eh ka la poi sha kaba kut ha ka Sngi Thohdieng ha kaba ka West Jaiñtia District Sports Association ka la rah ïa ka nam lahduh ha ka kyrdan ïalehkai U-14 bad ka Shillong Sports Association ha ka kyrdan U-16.
Ha ka jingïakhun final jong ka U-14 kaba la long ha SSA Stadium kaba ha First Ground, Polo, ka West Jaiñtia DSA ka la pynliem noh ïa ka Nongstoiñ District Sports Association da 2-0 kol, katba ha ka U-16 ka Shillong SA ka la pynliem ïa ka Ri-Bhoi District Sports Association da 2-1 kol.
Ïa kane ka lympung la pynïaid da ka Meghalaya Football Association bad la ai jingkyrshan lang da ka tnat ïalehkai jong ka Sorkar Jylla.
Ha kane ka sngi la ïadon lang u Myntri ka tnad ïalehkai ïalehkai u Bah Shakliar Warjri bad kiwei ki riew rangbah ki ba kynthup ïa u MDC ka Mawsynram u Bah Alvin K. Sawkmie bad u Working President ka Meghalaya State Olympic Association u Bah John F. Kharshiing. Ka Kongsan ha ka jingïakhun phainal jong ka U-14 ka dei ka Deputy Commissioner ka East Khasi Hills ka Kong R.M Kurbah. Ha kane ka sngi la donlang ruh ki dkhot ka MFA naduh u President u Bah Hamletson Dohling bad u General Secretary u Sunesh Syiem.
Ha ka jingïalehkai final jong ka U-14, u Shanmiki Myrchiang ka WJDSA u la lah ban thep kol bad buh ïa ka kynhun jong u shakhmat ha kaba sdang jong ka kylla miet bad hadien kata la thep kol sa kawei da u Elvinson Lyngdoh tang hadien katto katne por, ha kaba ka NDSA kam shym la lah ban pynphai haduh kaba kut ka jingïalehkai.
Kumjuh ha ka phainal jong ka U-16, ka Ri-Bhoi ka la shah thep lyngba ka penalty bad ïa kane la thep da u Menangpyndap Khongjee ha ka kylla step. Ka RBDSA ka la lah ban pynïakhaid ha ka kylla miet lyngba u Wanplielad Marbaniang hadien ka jingleh bakla u rangap kol ka SSA hashwa ba u Iminstar Mawlong un thep biang ïa ka kol kaba ar na ka bynta ka SSA.
Te kumta baroh ar tylli ki kynhun kiba la khur ïa ka nam lahduh ki la ïohpdiang ïa ka khusnam kaba mar T.2 lak tyngka bad kiba wan ba-ar ki la ïoh mar T.1 lak tyngka. Ïa ka nam Player of the Final ha ka U-14 la khur da u Shanmiki Myrchiang (WJDSA) bad uba la khur ruh ïa ka nam Player of the Tournament. U paralok ba ïalehkai lang u Kaisarmi Dkhar u la khur ïa ka nam Top Scorer, katba u Edyson Marbaniang jong ka SSA u la khur ïa ka nam Best Goalkeeper. Ha ka nam Player of the Final ha ka U-16 la khur da u Iminstar Mawlong (SSA), katba ki paralok ba ïalehkai lang kata u Iaiapkyrmen Kharkongor (Best Goalkeeper) bad Menangpyndap Khongjee (Player of the Tournament). U Me-u-ba-ai Sumer na ka Ri-Bhoi u la khur ïa ka nam Top Scorer.
Haba kren jingkren ha katei ka sngi, u Bah Shakliar u la ong ba ka “Ka Meghalaya Youth League ka ïahap bha bad ka jingthmu jong ka Sorkar Jylla na ka bynta ban kyntiew ïa ki khynnah ïalehkai jong ngi bad kine ki jingpyrshang kin seisoh na ka bynta ka lawei ka Jylla jong ngi.”
U la pynpaw ruh ba ha u snem ban wan yn sa sdang ban maramot noh ia ka madan ialehkai jong ka MFA kaba don ha Third Ground.
