Shillong, Risaw 11
Kan dei ka sngi kaba khatduh na ka bynta u rangïalehkai ba pawnam jong ka Spain bad Barcelona, u Andres Iniesta hadien ba u la pynbna ba un shongthait noh shi syndon na ka kam ïalehkai phutbol.
Une u khlur ïalehkai uba la don bynta ban rah nam jop ha ka World Cup 2010 na ka bynta ka Spain, u la pynpaw ha kaba jar jar sha ki nongkyrshan naduh mynshem taïew.
“Ka jingdon ha madan ka la poi sha kaba kut noh,” ong u Iniesta uba paw ba u don ka jingsngewkhia ha ki nongthoh khubor ha kawei ka jingïalang ha Barcelona.
“Ngam lah ban jngai na ka phutbol, ka dei ka jingim jong nga bad kan dang ïai bteng ban long ka jingim jong nga,” u la bynrap, da kaba ong ba u thmu ban leit sha ka kam coach na ka bynta ban ai jinghikai.
Ha ka dur-khih kaba pynsngewsih kaba la sam lyngba ka online, kaba la thoh ‘Ka jingïalehkai kan ïaid shakhmat’, khatduh khatwai u Iniesta u la wan shakhmat bad pynbna ba un shongthait noh na ka jingïalehkai, kaba pynkut noh ïa ka jingim kaba la pynitynnad ha ka kam ïalehkai kaba la neh haduh 22 snem.
Haba la kylli kaei ka jingmut jong ka jingïalehkai ïa u Iniesta uba long u rangïalehkai shapdeng barim jong ka La Roja bad ka Barcelona, hynrei u la ïoh ka jingïaroh na ki coach barim kum u Luis Enrique, Arrigo Sacchi, Louis Van Gaal, Pep Guardiola, bad u Vicente Del Bosque.
“Ka pynpaw ïa kaei kaba ngi la sngew ha ka por ba ngi dangrit ha surok. Haba ka kmie jong phi ka khot ïa phi, hadien ba la dum haba phim ïohi shuh ïa ka bol. ‘Ale hangne! To wan hangne!’ Uto u dei u Andres Iniesta,” ong u Luis Enrique, u nongpynïaid phutbol barim jong ka Spain bad uba dei u coach ba mynta jong ka Paris Saint-Germain.
Ha ki 18 snem jong ka jingïalehkai, u Iniesta u la don bynta ban jop khyndai sien ha ka LaLiga, saw sien ki khusnam Champions League, lai sien ki FIFA Club World Cup, hynriew sien ha ka Copa del Rey, lai sien ha ka UEFA Super Cup bad hynriew sien ha ka Spanish Super Cup ryngkat bad ka Barcelona bad u la ïehnoh shadien ïa ka pateng kaba ym lah ban nujor.
