Bhubaneswar, Risaw:
Ki la don kumba 195 ngut nonghikai ha ki kyrdan ba hapoh ki bym shym la poi sha ka kam ha Nabarangpur distrik wat la ki la ïoh ïa ki shithi ba la ïateh bad u Myntri Rangbah ka jylla Odisha u Mohan Charan Majhi.
Katba ka jingdawa ban thung kam kyrpang na ka bynta ki distrik ka nang jur ha ka thaiñ ba shaphang Shathie jong ka Odisha, ki nongshong shnong bad ki dkhot jong ka komiti treikam ba ïatreilang jong ka distrik ki la khang ïa ki skul bad khanglad ïa ki nonghikai ban ïasohlang ha kylleng ka distrik.
Ki nongïakhih ki la maham ïa ki nongpynïaid skul ba kin pynjur ïa ka jingïakhih lada ki nonghikai kiba wan na kiwei pat ki distrik ki trei ha ka kam ha ki skul kiba don ha ka thaiñ jong ki. Ha kaba ïadei bad kane, ka la pynlong ïa kine ki nonghikai ba kim ïohlad ban leit hikai ha kine ki skul ba ki la shah thungkam.
Kine ki nonghikai ki la poi ha kane ka thaiñ na ka bynta ban leit hikai sha ki skul ba ki dei ban hikai, hynrei kine ki la shah pynibor bad shah khang ha ki trai shnong kiba shong basah ha ki shnong kiba kynthup ha Dangara, Biriguda, Laharakani bad Gopiguda kaba don ha Papdahandi, kiba kum kine ki jingjia ki la jia ruh ha Jharigaon block ha kaba 44 ngut ki nonghikai ki la shah khang ban rung ha ka kam jong ki wat lada ki dei ban sdang noh.
La khanglad ruh ïa kumba 29 ngut ki nonghikai ha Dabugaon bad 30 ngut ki nonghikai ha Chandahandi Block ban trei ha ka kam.
