Shillong, Risaw 13
Wat la ka jingbym shim bynta lang ki nongjop ha ka Paris Olympic, ka India kaba long ka nongpdiang ïa ka lympung ïalehkai siat suloi, ka la khmih lynti ban ïalehkai bha ha ka World Cup Final, ka ban sdang la Sngi Ba-ar. Ha kane ka lympung ka Rhythm Sangwan kan long kum ka nongïalam ïa ka kynhun jong 23 ngut ki nongïalehkai ka ri.
Ki nongïalehkai kiba la khur takma ha ka Paris Olympic ki la ioh rung sha kane ka lympung, hynrei ka Manu Bhaker, u Sarabjot Singh bad u Swapnil Kusale kiba la khur ïa ka takma rnong, ki la weng ban ym shim bynta ha kane ka lympung ka ban long ha Dr. Karni Singh Range.
Nalor ka Rhythm, ki khlur kiba dangkiew kum ka Ganemat Sekhon (women’s skeet) bad ka Sonam Maskar (women’s 10m air rifle) ki la khmih lynti ban ïalehkai bha ha kane ka lympung, hadien ba ki la ïoh jaka sha kane ka kyrdan ïalehkai ka pyrthei.
Ha kane ka lympung, ka India ka don khyndai ngut ki nongïalehkai na ka Paris Olympic 2024, ba kynthup ïa u Arjun Babuta (men’s Air 10m), u Anish Bhanwala (men’s 25m rapid fire pistol). Ka Rhythm kan ïakhun ha baroh ar tylli ki jingïalehkai jong ki kynthei jong ka jingïakob 10m air pistol bad 25m pistol.
Kiwei pat ki nongïalehkai Olympic kiba don ha katei ka kynhun ki kynthup ïa u Mairaj Ahmad Khan (men’skeet), u Divyansh Singh Panwar (men’s 10m air rifle), bad u Chain Singh (50m rifle 3 positions).
Kiba la pynkhreh ruh ban siat ha ka World Cup Final ki long u Arjun Singh Cheema (mem’s 10m air pistol), u Vijayveer Sidhu (men’s 25m rapid fire pistol), u Anantjeet Singh Narukha (men’s skeet), ka Maheshwari Chauhan (women’s skeet), ka Rajeshwari Kumari (women’s trap) bad ka Shreyasi Singh (women’s trap). Baroh kine ki nongsiat suloi ki la ïalehkai ha ka Paris Olympic.
Ka jingïalehkai kan sdang ha ka sngi ba-ar ha kaba ka 10m air rifle jong ki kynthei kan long kaba nyngkong eh ha ka por ba la buh, ha kaba yn bud sa ka jingïalehkai jong ki shynrang. Ka phainal 10m air pistol jong ki shynrang bad kynthei ruh ka la buh ban long ha ka sngi kaba nyngkong.
