Jowai, Risaw 13
Ka Karate ka dei kawei na ki jingïalehkai kaba paw bha ha ki snem 1980 ha kaba bun ki samla samhoi ka Rilum Jaiñtia ki long kiba smat bha ha kane ka jingïalehkai.Hynrei namar ka jingbym don ki jaka ïalehkai ba paka ka la pynnoh mynsiem ïa kiba bun bad don katto katne ngut kiba dang bteng ïa ka jingïalehkai ha la ki jong ki jaka ba ki don.
Kane ka dei ka jingïalehkai kaba ïarap ban ïoh ïa ka bor met kaba smat ba sting bad ban ïada ruh ïalade (self-defence) bad ïarap ruh ïa ki khynnah ban nang ïa ka burom ka akor bad pynleit jingmut ha ki kam ki jam.
U Bah Alan Niangti (2nd Dan Shotokan Black Belt) bad uba long u President jong ka West Jaiñtia Hills Karate Do Association (WJHKA) haba kren bad u nongthoh khubor haba pynkut ïa ka Special Training Camp ha ka 12 tarik mynta u nai, u la ong “Ka jingbym don ki jaka ïalehkai kiba paka ka la pynlong ruh ïa ki synjuk ban noh mynsiem bad sangeh ban pynlong ïa ki jinghikai ha ki phew phew snem,”
U Bah Alan u la ïathuh ba dangshen ha Naitung hadien ba ki la ïoh ïa ka jaka ïalehkai na ka Loompyrdi Ïongpiah ki la sdang pynkhih mynsiem ïa ki khynnah kiba don ha kane ka sap ïalehkai bad sdang ïa ka jingkilan ïa ki khynnah bad ki samla.
Kane ka jinghikai ka la sdang naduh 7 tarik bad la pynkut ha ka 12 tarik mynta ubnai bad la shim bynta da ki phew ngut ki khynnah bad samla ïaleh-kai jong ka district.
U Bah Alan u la ïathuh ruh ba ka jingpynkhie im ïa kane ka jingïalehkai karate ka dei na ka bynta ban pynkhreh ïa ka Meghalaya Games 2025.
U Bah Khroobok Pas-sah, DSO, West Jaiñtia Hills, u pynpaw ka jing-kmen halor ka jingpynkhie im biang ïa kane ka jait jingïalehkai hapoh ka District kaba dei ka jingïalehkai kaba ki khynnah ki hap ruh ban trei shitom dalade bad u kyrmen ba lyngba ka jingshim khia jong ki bor pynïaid jong ka WJHKA, ka District kan ïoh ban rah nam bad burom ha ka Meghalaya Games 2025.
U Bah Passah u la kular ban ai ka jingïatreilang bad kane ka WJHKA ha kano kano ka por khnang ban kyntiew ïa kane ka jait ïalehkai na kawei ka por sha kawei pat.
Ha kane ka sngi pynkut ïa ka jinghikai la ïadonlang ruh u Bah E. Manbha Kynjin (1st Dan Black Belt) kum u Gene -ral Secretary WJHKA, u Wyraiki Kharbukhi kum u Vice-President, u Yatha Chyrmang kum u Asst. General Secretary (1st Dan Black Belt), u Pynioochwa Phira kum u Treasurer (1st Dan Black Belt) bad u Ribait O. Pde kum u Auditor (1st Dan Black Belt).
La ïadon lang u Bah Donboklang Lyngdoh (5th Dan Black Belt) u dkhot ka All Meghalaya Karate Do Association (AMKA) bad kiwei.
Ki jait jinghikai ba la hikai ïa ki khynnah, ki long kiba ïaid katkum ki dustur bad ka rukom ai jinghikai karate, kynthup ïa ka Punching, Kicking, Blocking, Self-Defense nalor kiwei ki jait jing-hikai kiba ïahap bad ka jingïaid lynti jong kane ka jait ïalehkai.
