Guwahati, Risaw:
Arngut ki briew ki la shahkem ha ryngkat hynriew tylli ki lyngkhot ksiar Guwahati, Assam, ha ka janmiet jong ka Sngi Thohdieng.
Kumba la ïathuh ka tyllong khubor, la ong ba kine ki arngut ki la shahkem ha ka kynhun Special Task Force (STF) jong ki pulit Assam. Na ka jingïoh jingtip halor ka jingdon jong kine ki briew, ki pulit ki la pynlong ïa ka jingleit khynra ha kawei ka ïing kaba don ha ka thaiñ Kerakuchi ha Guwahati.
Ha ka jingkhynra ki pulit ki la lap ïa arngut ki briew kiba shah suba jur. Haba ki pulit ki la peit bniah na ki, ki la lap ïa hynriew tylli ki lyngkhot ksiar thok kiba don ka jingkhia kaba 5.7 kilo. La ïa ïoh ban kurup ruh lai tylli ki Mobile Phone na kitei ki runar.
Ïa kine ki arngut la tip kyrteng kum u Sohidul Islam (23) bad u Ainul Hoque Choudhury (30). Baroh ar ngut kine kiba la shah kynnoh ki dei kiba shong basah ha Lakhimpur kaba don ha Assam.
Ki pulit ki la ïathuh ba mynta ki dang tohkit ïa ka rukom treikam bad ka bynta jong ki ba ki trei ha kane ka kam ba ïadei bad ka jingrah ïa ka ksiar thok.
