Mumbai, Risaw:
Ki pulit jong ka nongbah Mumbai ki dang ïai bteng ban pynlong ïa ka jingleit thwet sha kylleng ki jaka khnang ban ïohkem ïa ki runar ba la donkti ban shim ïa ka jingim jong u nongïalam ka seng NCP u Baba Siddique.
Ka kynhun runar jong u Lawrence Bishnoi ka la kam ba ka la donkti ha ka ban pynïap ïa u Myntri barim jong ka Maharashtra u Siddique, la ïathuh ka tyllong khubor. U nongïalam jong ka seng NCP uba la 66 snem ka rta u la shah siat ïap habar ka jaka treikam jong u khun u Zeeshan Siddique ha Bandra East, kaba don ha Mumbai, ha ka miet jong ka sngi U Blei.
Ki pulit ki la ïathuh ba ki la don lai ngut ki briew kiba la donkti ha ka jingsiat ha kane ka jingjia, la ïathuh ka tyllong khubor. Arngut na ki ki dei kiba la tip kyrteng kum u Gurmail Baljit Singh, 23, na Haryana, bad u Dharamraj Kashyap, 19, na Uttar Pradesh kine baroh arngut ki la shahkem. Uwei pat uba lai u dei uba la tip kyrteng kum u Shiv Kumar Gautam na UP, une haduh ba la thoh ïa ka khubor u dang phetrieh na kti jong ki pulit.
U Kashyap bad u Gautam ki dei kiba na Bahraich kaba don ha UP. Ka tyllong khubor ka la ïathuh shuh shuh ba ki pulit jong ka Bahraich ki la ong ba ym pat ju don napdeng kine kiba shah kynnoh donkti ha ka jingjia ba kin leh ïa kum kine ki kam pyntriem ha ki por ba hashwa hynrei ki la kwah ban leh ïa kane ka kam da ka jingïatreilang ba ka kynhun runar jong u Lawrence Bishnoi.
Kine ki la ïadei kam bad ka kynhun jong ki runar ha ka por ba ki dang shah set patok ha Punjab. Ki pulit ki dang wad sa ïa uwei pat uba saw uba la shah kynnoh ba u la long u snar nongïalam ha kane ka kam pyntriem.
Kane ka jingjia kaba shyrkhei, ka la jia ha ka por 9:30 mynmiet haba kine ki runar ki la siat, pyrshah ïa u Siddique bad ïa u nongïarap jong u, da bun kuli ha kaba ki kuli ba la siat ki la ksam ïa ka shadem jong une u riewsaiñ pyrthei.
Khyndiat kynta hadien kane ka jingjia, ka kynhun runar jong u Bishnoi ka la kam ba ka la donkti ha kane ka jingpynïap briew ha ka jingphah khubor ha ka Social Media.
Ki kynhun tohkit jong ka sorkar kmie ki la tohkit bniah mynta halor ka khubor ba la pynsaphriang ha kaba la pynshisha ba ka dei na ka Facebook Account hapoh ka kyrteng Shibu Lonkar. Ka tyllong khubor ka la ïathuh ba ka lah ban dei shisha ka jong u Shubham Rameshwar Lonkar, u dkhot jong ka kynhun u Bishnoi.
U Shubham u la shahkem teng ha basdang une u snem ha Akola, kaba don ha Maharashtra, halor ka jingdonkti jong u ha ka jingrah kylleng ïa ki tiar siat da ka lynti kaba beaiñ bad la ngeit skhem ba une u don ka jingïadei bad ka kynhun runar u Bishnoi.
Ha ka por ba la pynlong ïa ka jingtohkit, u Shubham u la phla ba u la ïakren lyngba ka Video Call bad u Anmol Bishnoi, uba dei shi para bad u Lawrence Bishnoi, ha kaba nangne la pynithuh ïa u sa bat u nongïalam jong ka kynhun ki runar.
Kine kiba la shah kynnoh, ki la buddien da bun bnai halor u Siddique, ha kaba ki la pynlong ïa ka jingkhmih bniah ïa ka rukom leit rukom wan jong u ha baroh ar kata ha ka jaka treikam bad ha ïing, la ïathuh ki pulit.
Ki pulit ki la ïathuh ba kine kiba la shah suba ki la ïoh ïa ka boina kaba mar `. 50,000 na ka bynta kane ka kam pynïap briew, bad ki la ïoh ruh ïa ki tiar siat khyndiat sngi shwa ba kin leh ïa kane ka kam. Arngut kiba la shah kynnoh ki dang don mynta ha kti jong ki pulit, katba ka jingleit thwet sa ïa uba dang phet rieh ka dang ïai bteng.
Ha kajuh ka por, ki pulit jong ka Mumbai ki la nang pynjur ïa ka jingpahara ha ka jaka sah jong u Salman Khan, ha kaba la jia teng ka jingsiat.
Ha ka miet jong ka 14 tarik, Ïaïong, ka jingsawa kuli ka la pynher syrngiew ïa kiba sah ha marjan jong ka Bandra kaba don ha Mumbai haba ar ngut ki briew kiba la shong ha ka kali arshaka ki la siat da bun kuli ha ka jaka sah jong u khlur ak phlim ka Bolly Wood u Salman Khan.
Kine kiba donkti ha kane ka kam thombor ki dei kiba don jingïadei bad ka kynhun runar jong u Lawrence Bishnoi, ha kaba ki la shah pynngat ha ki kyndon aiñ halor ka jingïasuhbuit sniew ban pynïap bad ban leh ïa ki kam pyntriem.
Katkum ka jingmudui, la ong ba ka kynhun u Bishnoi ka la thong da `. 25 lak ban phah pynïap ïa une u khlur ak phlim, ha kaba kane ka jingthmu ka la ïaid da bun bnai, naduh u Nailar jong u snem 2023 haduh u Ïaïong jong u snem 2024.
Ki nongïalam na kiba bun ki kynhun bad ki riewpawkhmat ki la pynpaw ka jingsngewlem halor ka jingshah pynïap jong u Siddique.
Ki riewsaiñ pyrthei ki la pynrem jur halor kane ka kam pyntriem bad pynpaw ba ka jingdon jong ki kam pyntriem ha Maharashtra ka la nang kiew katba nang mih ki sngi.
