Khliehriat, Risaw 14
Ka Rymbai Synrangshahkhain SC bad Jalyiah United SC ki la ïoh jingjop ha ka sngi sdang jong ka lympung ïalehkai 1st Division Football Tournament ba la pynïaid da ka East Jaiñtia Hills District Football Association (EJHDFA).
Ha ka jingïalehkai kaba la long ha ka Lah Sngi U Blei ha madan Deinshymrum, Khliehriat, ka Rymbai Synrangshahkhain ka la pynliem noh ïa ka Byndihati CSC da 1-0 kol bad ïa kane la thep da u Hikaidame Bareh ha ka minit kaba 61.
Ha ka jingïalehkai kaba bud, ka Jalyiah United ka la jop da 2-0 kol ïa ka Khliehriat West FC. Ïa kine kol la thep da u Jusmi Dkhar ha ka minit 11 & 63.
Ïa kane ka lympung la plie da u Bah Merimon Rymbai, Waheh Shnong barim ka Rymbai ha ka jingdonlang u CEM barim ka JHADC u Bah Hambertus Nongtdu nalor ki nongïalam bad dkhot ka EJHDFA.
Ka jingïalehkai ha ka Sngi Ba-ar kan long hapdeng ka Lumshken SC bad Pamrakmai SCSC ha ka por 12 baje mynsngi, katba ka Tpepswer SWWO ïa ka Mukhaïalong SCSC ha ka por 2:30 janmiet.
