Shillong, Risaw 14
Ka Meghalaya Jeet Kune Do Association (MJKA) ka la pynhap pyrda noh ïa ka Meghalaya State Level Jeet Kone-Do Championship 2024 ha ka 12 tarik u Risaw ha Laitkor Kynton-U-Mon ha kaba ka East Khasi Hills ka la rah ïa ka nam lahduh bad ka East Jaiñtia Hills ka la wan ba-ar.
Ha kane ka lympung kaba la sdang naduh 11 tarik la ïashim bynta kumba 80 ngut ki khynnah na kylleng ki district jong ka Jylla.
Ha katei ka sngi ka Kong Anita Nongkhlaw ka la long kum kongsan ha kaba ka la kren ai mynsiem bad pynshlur ïa ki nongshim bynta na ki lai tylli ki district. La ïadon lang ha katei ka sngi da ka Kong Bajoplin Kharmudai, General Secretary ka MJKA bad kiwei ki para dkhot jong kane ka synjuk. U nongseng ïa ka Jeet kune do ha Meghalaya u Bah Donny Raphael Ranee u la pynïaid ïa kane ka lympung kum u Chief Technical Director.
Na ka liang ka Secretary ka Kong Bajoplin Kharmudai ka la ong ba wat la ka MJKA kam pat shym ïoh jingïarap eiei naduh u 2012 haduh mynta na ka tnat ïalehkai. Hynrei ban kyntiew ïa ki khun samla, ka synjuk ka la ïai pynlong ïa kane ka State Level Jeet Kune do championship la kumba 9 snem mynta.
Kane ka synjuk kaba la kam ba ka la pynmih ruh ïa ki nongïalehkai ha ki lympung ïalehkai shabar ri, ka la buh ka jingkyrpad ïa ki bor ba halor jong ka Sorkar ban pynrung lem ïa ka Jeet Kune Do ha ka 6th Meghalaya Games ka ban sa long ha West Jaiñtia Hills ha u snem 2025.
