Shillong, Risaw 14
Ka Meghalaya ka la mad ïa ka jingshah rem ha ka Services da shi inning bad 65 run ha ka jingïakhun kaba nyngkong jong ka Ranji Trophy 2024-25 ha ka Lah Sngi U Blei.
Ka Meghalaya ka la don ha ka Elite Group-A hadien ba ka la lah ban ïalehkai bha ha ka Plate Group ha ka samoi ba la dep bad wan ba-ar ha Hyderabad. Kane kam dei ka sien ba nyngkong ba ka Meghalaya ka la rung sha ka Elite Group, hynrei ka jingïalehkai kaba mynshwa jong ka, ka dei ha u snem 2021-22 ha kaba la pynduna ïa ka samoi ïalehkai na ka daw jong ka khlam Covid-19 bad ki la ïakhun tang lai tylli ki jingïalehkai.
Mynta ka kynti ka samoi ïalehkai ka la don ha ka thup kaba pura, ha kaba ka Meghalaya ka dei kawei na ki phra tylli ki kynhun kiba don ha ka Group-A, kiwei pat ki long ka Services, Baroda, Jammu and Kashmir, Maharashtra, Odisha, Tripura bad ka Mumbai.
Ka jingïalehkai pyrshah ïa ka Services ka la sdang ha ka sngi Thohdieng ha nongbah Delhi ha kaba ka Meghalaya ka la jop ïa ka jingkynting pisa bad jied ban kawang bol nyngkong. Ka Meghalaya ka la leh bha ha ka ban kawang bol, hynrei arngut ki nongtied jong ka Services ki la lah ban ïalehkai bha na ka bynta ban kamai ïa ki shispah run na ka bynta ban joh sha ka 402 run bad shah pynhap baroh ki nongtied. Nangta ka Meghalaya ka la shah beh thong ha kaba nyngkong da kaba kynjoh sha ki 233 run shwa ban pynlong ha kaba bud da 104 run bad ban shah pynkhyllem baroh ki nongtied.
Ka Services ka la duna sha ki 112/3 bad ki la duh noh ïa ki 6 tylli ki wiket ba khatduh na ka bynta 78 ron, hynrei ka jingïatreilang u Ravi Chauhan (113) bad u Rajat Paliwal (107) ka la pynlong ia kane ka kynhun shipai ban kynjoh sha ka thong.
U Aryan Borah u la lah ban pynpaw ïa ka jingtbit ha kaba u la khur 4/90 na ki 34 over, katba u Ajay Duhan (guest player) u la khur 3/11 na ki 7.4, u Dippu Sangma 2/56 na ki 23 over bad u Akash Kumar Choudhary u la ïoh 1/93 na ki 29 over.
Haba wan beh ïa ka thong ba la buh da ka liang pyrshah, ka Meghalaya ka la shah pynhap 5 wiket na ka bynta 44 run, ha kaba u kapten ka kynhun u Kishan Lyngdoh u la tied 25 run na ki 27 bol. Nangta ki rangïalehkai (guest players) u Sumit Kumar (87) bad u Anirudh B (69) ki la lah ban kynjoh sha ki 138 run. U Akash u la ïoh 23 run ha kaba ka Meghalaya ka la shah pynkhyllem baroh na ka bynta ban kamai 233, ha kaba ka dangduna sa 169 run.
Hadien ka Meghalaya kam shym la lah ban ïalehkai bha bad ha ka sngi kaba saw ka la kamai 104 run bad shah pynhap 9 wiket, ha kaba u Dippu u la hap ban shongthait noh namar ka jingmynsaw.
Kumta ka Meghalaya kan wanphai noh sha la ïing na ka bynta ban ïakhun pyrshah ïa ka Tripura naduh ka 18 tarik mynta u bnai. Ka jingïalehkai kaba nyngkong jong ka Tripura ka long pyrshah ïa ka Odisha ha Agartala, hynrei ïa kane la pynsangeh bad la pynïasam mar shi point.
