Shillong, Risaw 15
U Kevin Christopher u la khyrwit ïa ka shiteng spah run bad u Abhishek Kumar u la ïoh saw wiket hynrei ka Meghalaya ka dang mad ïa ka jingshah rem ha ka Punjab da ka shi inning bad 129 run ha ka jingïalehkai kaba nyngkong jong ka U-23 ki shynrang Col CK Nayudu Trophy 2024-25.
Kane ka jingïakhun kaba la sdang naduh ka Sngi U Blei ha kaba ka Meghalaya ka la jop ïa ka kynting pisa pyrshah ïa ka Punjab bad ka la shimti ban kawang bol shwa.
U Abhishek u la sdang ban kawang bol nyngkong da kaba ïoh 4/71 ha ki 23.2 over ha kaba ka Punjab ka la shah pynkhyllem baroh ki nongtied bad ban ïoh 313 run. Baroh 5 ngut ki nongkawang bol ka Meghalaya ki la ïoh ban shim wiket, ha kaba u Manish Sharma u la ïoh 3/72 ha ki 31 over, u PM Santhosh u la shim 1/46 ha ki 12 over, u Purav Agarwal u la ïoh 1 /46 ha ka 11 over bad u Navin Kr Ray (1/60) ha ka 16 over.
Haba wan shimti ïa ka pali kaba ar ka Meghalaya kam shym la lah ban ïalehkai bha ha ka inning kaba nyngkong ha kaba la la shah pynkhyllem lut baroh bad ban kamai tang 77 run, ha kaba ïa ki 19 run la tied da u Navin. Hynrei hadien, u Kevin u la lah ban ïalehkai bha ha kaba ïoh ban tied 52 run na ki 69 bol, kynthup ïa hynriew tylli ki ‘four’ lem bad lai tylli ki ‘six’. Hynrei ka kynhun jong u ka danglah ban kamai 107 run, kaba la ai jingjop ïa ka Punjab, ha kaba dangsah sa ar sngi.
Ka Meghalaya kan pynkhreh ïa ka jingïakhun kaba ar pyrshah ïa ka Andhra Pradesh naduh 20 tarik mynta u bnai.
