Mumbai, Risaw:
U MLA ka seng Congress na Igatpuri, u Hiraman Bhika Khoskar, u la leit ban pynïasoh sha ka seng Nationalist Congress Party (NCP), kaba la ïalam da u Ajit Pawar ha shwa ban pynlong ïa ka ilekshon Assembly ha Maharashtra.
U Khoskar bad ki nongkyrshan jong u ki la pyntikna ha ka jingpynïasoh bad ka seng NCP ha ka ïingsah jong u Ajit Pawar ha Mumbai ha ka Lah Sngi U Blei.
U Symbud Myntri Rangbah u Ajit Pawar bad u President jong ka seng NCP ha ka jylla u Sunil Tatkare u la pdiang burom ïa u Khoskar hapoh ka seng.
“U Hiraman Bhika Khoskar u la pynïasoh bad ka seng NCP ha ryngkat palat phew ngut ki nongkyrshan jong u kiba kynthup ïa u dkhot barim jong ka Zila Parishad u Sampatnana Sakale ha ryngkat ka jingdonlang jong u Ajit Pawar bad u Sunil Tatkare ha Pune,” la ong ka jingthoh kaba la wan na ka seng NCP.
Ka seng ka la pynpaw shuh shuh da kaba ong ba kane ka dei ka sien kaba ar ha kaba don bun tam ki dkhot ki ban rung hapoh ka seng NCP bad la ong ruh ba u khlur ak phlim ba pawnam u Sayaji Shinde ruh u la rung sha ka seng ha Mumbai.
Ka seng NCP ka la ïai ban da kaba ong ba ka jingleit pynïasoh jong u Khoskar bad ka seng kan sa nang pynkhlaiñ bor shuh shuh ïa ki jingpyntrekam hapoh Nashik bad ha ki thaiñ ba marjan ha shwa ka ilekshon Assembly.
“U Khoskar u la ïoh ïa ka jingkyrshan kaba khlaiñ ha ka thaiñ Nashik khamtam ha ka kynhun jaitbynriew riewlum,” la bynrap shuh shuh ka jingthoh.
Ha ka jingpynbna ïa u dkhot bathymmai ha ka jingthoh ba la buh ha ka rynsan X, ka seng ka la pynpaw kyrteng ïa kiba bun kiwei pat ki dkhot kiba la pynïasoh bad ka seng kiba la long ki dkhot jong ka Zilla Parishad bad kumjuh ruh ki heh ophisar barim ha kiba bun ki distrik.
U Sandeep Gopal Gulve, u Sampatanana Sakale, u dkhot barim ka Zilla Parishad u Jarnadan Mama Mali, u dkhot barim ka Zilla Parishad u Uday Jadhav, u Vinayak Malekar, u Jairam Dhande, u Prashant Kadu, Pandumama Shinde, u Dnyanedhashwar Kadu, u Sarpanch Jagan Kadam, u Di Feroze Chalip Shaikh, u Ramesh Jadhav, u Dashrath Bhagde, u Sudam Bhor, u Arun Gaikar, u Shivaji Sirsat ruh ki la pynïasoh sha ka seng NCP.
“Da ka jingwan rung u Khoskar, ka jingkhlaiñ bor jong ka seng NCP ka la nang kiew,” la ong ka khubor.
Ka ilekshon Assembly ha Maharashtra, kan long ha ki 288 tylli ki konstitwensi.
Ka Election Commission of India haduh mynta kam pat pynbna ïa ki tarik ban pynlong ïa kane ka ilekshon.
Ha kane ka elekshon ban wan ha Maharashtra, kan don ka jingïakhun hapdeng ka kynhun synrop jong ka Maha Vikas Aghadi -kaba kynthup ïa ka seng Shiv Sena-UBT, ka NCP (ka kynhun u Sharad Pawar), bad ka Congress bad ka Mahayuti Alliance — kaba kynthup ïa ka seng BJP, Shiv Sena (ka kynhun jong u Eknath Shinde) bad ka NCP (ka kynhun jong u Ajit Pawar).
