Shillong, Risaw 15
U Vice-President ka Megha-laya Cricket Association (MCA), u Bah Rayonald Kharkamni u la shah thung kum u nongpeit pyrman (Match Observer) jong ka BCCI na ka bynta ka jingïalehkai Test kaba lai hapdeng ka India bad ka New Zealand ha Mumbai, ka ban sdang naduh ka 1 tarik u Naiwieng mynta u snem.
U Bah Kharkamni uba long u President jong ka Ri-Bhoi District Cricket Association bad u dei uba don bynta ban kyntiew ïa ka jingïalehkai kriket ha katei ka district bad kumjuh ïa ka Jylla la kumba katto katno snem.
Ki nongpeit pyrman na ka bynta ki jingïalehkai kin pynkhreh ïa ki kaiphod ba thikna ha kaba ïadei bad ki jaka ïalehkai, ki umpire, ki nongïalehkai bad kiwei kiwei.
Kane ka jingwan ïalehkai ka New Zealand sha India kan sdang da ka Test ba nyngkong ha Bengaluru ha ka sngi Balang, ka ban bud pat sa ka jingïalehkai Test kaba ar naduh ka ban long ha ka 24 tarik mynta u bnai ha Pune bad ka Test kaba lai kan sdang naduh ka 1 tarik u Naiwieng ha Mumbai.
