Jowai, Risaw 16
Ka Khimusniang ka la khur ïa ka jingjop ha ka lympung ïalehkai 1st Division Football Tournament (Chatister Kharkongor Memorial Trophy 2024) ba la pynïaid da ka West Jaiñtia District Sports Association (WJDSA), hadien ba ka la lah ban pynliem noh ïa ka Sabahmuswang da 3-0 kol ha ka sngi Balang ha Kiang Nangbah Stadium, Jowai.
Haba phai sha kane ka jingïalehkai, ka Khimusniang ka la pyni ïa ka mynsiem ïakhun namar ba kam shym la ailad ïa ka liang pyrshah ban thep kol. Hadien shiteng kynta kane ka kynhun ka la ïoh ban pynkhih jar nyngkong eh lyngba u Risanlangki Dkhar ha ka minit kaba 36.
Ka Khimusniang ka la thep biang sa ar kol ha ka kylla step lyngba u Dawanbiang Passah ha ka minit kaba 48 bad u Allan Donald Paslieñ (88) na ka bynta ban jop syndon.
Ka jingïalehkai ha ka sngi Palei kan long hapdeng ka Sohmynting pyrshah ïa ka Nangbah Ïawmusiang ha ka por 2 baje nohphai sngi.
