New Delhi, Risaw:
Ka India ha ka Sngi Ba-ar ka la ïasoi ïa ka jingïateh kular kaba heh bad ka US ban lah thied ïa 31 tylli ki Predator Drone kiba khlaiñ na ka kompeni ïada ri jong ka America ka General Atomics hapoh ka dor jong ki rukom die ïa ki tiar shipai bar ri ka ban kot lajan USD 4 billion kaba long T. 32,000 klur halor ka jingthmu ban kyntiew ïa ka jinglah jong ki shipai India ban ïakhun pyrshah ïa ki jingeh kiba wan na ki jingïapher jingmut halor u pud u sam bad ka China.
Ïa ka jingïateh, la ïasoi ha ryngkat ka jingdonlang jong ki heh ka tnat ïada ri jong ka India ha ka nongbah jong ka ri, kane ka pyni ïa ka jingkiew ha ka liang ka jingïadei ki shipai jong kine ki ar tylli ki ri, la ïathuh ki heh sorkar ha ka jingïakren bad ki nongthoh khubor. Ka jingïakut ban thied ïa ki Drone la pynkut noh khyndiat taïew hashwa ban pynlong ïa ka jingjied President jong ka US.
Ha ka taïew ba la lah, ka Cabinet Committee on Security (CCS) ba la khlieh da u Myntri Rangbahduh u Narendra Modi ka la mynjur ban thied ïa ki MQ-9B ‘hunter killer’ Drone.
U Vivek Lall, uba long u Chief Executive of General Atomics Global Corporation uba la long u nonglamkhmat ha ka jingïakren na ka bynta kane ka jingïateh, u la donlang ha ka por ba la don ka jingïasoi. Ïa kine ki Drone la thied ha ka jinglut kaba la antad kumba USD 4 billion, la ïathuh ki heh sorkar.
Ka India ka thied ïa ki Drone khamtam eh na ka bynta ka jingkhmih bniah jong ki shipai, khamtam ha ki jaka ba don ka jingïaleh pyrshah bad ka China. Ha u bnai, Jylliew jong u snem ba la lah, ka tnat ïada ri ka la mynjur ban thied ïa ki Drone MQ-9B Predator na US hapoh ka jingïatreilang jong ki sorkar.
Ka MQ-9B Drone ka ïapher na ka MQ-9 “Reaper” kaba la pyndonkam ban pynher ïa u ‘namding ba la pynkylla dur jong u Hellfire uba la pynïap ïa u nongïalam jong ka Al-Qaeda u Ayman al-Zawahiri hapdeng ka Kabul ha u bnai Naitung jong u snem 2022. Katba ki shipai duriaw kin ïoh 15 tylli ki Sea Guardian Drone, ka Indian Air Force bad Army kin ïoh mar 8 tylli ki Sky Guardian Drone.
Kine ki drone kiba khlaiñ bor, ki lah ban sah slem ha suiñ haduh palat 35 kynta bad ki lah ban kit saw tylli ki namding Hellfire bad kumba 450 kilo ki bom. Ïa ki Sea Guardian Drone la thied na ka bynta ban leh ïa kiba bun ki jingtreikam, kynthup ha kaba ïadei bad ka jingkhmih bniah ha ki bynta jong ki um, ka jingïakhun pyrshah ïa ki jhad ngam um kiba thmu ban wan syntiat ne kiba thmu wan thombor bad kumjuh na ka bynta ban khmih bniah ïa ki jingthmu thombor kiba wan nabar napdeng kiba bun kiwei pat.
