Shillong, Risaw 18
U Director ka tnat ki kam jngohkai ka Jylla, u Bah Cyril V. Diengdoh, IAS, u la ong ba ka tnad kam jngohkai kan hap ban ïakren bad ki trai jong ki jaka jngohkai bapher-bapher kiba don hapoh ka Jylla kiba kynthup ïa ki trai jong ki ïing-basa ne ki shnong kiba long trai ïa ki jaka jngohkai halor ki mat jingdawa jong ki nongñiah kali kamai tourist.
Haba kren sha ki lad pathai khubor hadien ba la wai ka jingïalang hapdeng ki nongñiah kali kamai tourist ka Jylla kaba la long ha ka 18 tarik u Risaw 2024 ha State Convention Centre, Shillong, u la ïathuh ba u la bthah ïa ki nongñiah kali kamai tourist ba kin ai da ka jingthoh sha u halor ki mat jingdawa jong ka kynhun khnang ba ka komiti kaba dei khmih halor kane ka bynta kan ïoh ban shong pyrkhat bad kan lah ban ïakren bad ki trai jong ki jaka jngohkai bapher-bapher kiba don hapoh ka Jylla.
“Ki la don shibun ki jingïakren bad ki jingai jingmut na ki kynhun nongñiah kali kamai bapher-bapher bad kiba bun na ki ruh, ki la pynsngew ïa ki mat kiba kongsan kiba ki don ha ryngkat ka jingai jingmut ïa ki jubab”, la ong u Bah Diengdoh.
U Bah Diengdoh u la ong ruh ba ïa ki jingïakren bad ki jingpynsngew baroh kiba la wanrah ha katei ka sngi da ki nongñiah kali kamai tourist, yn rah ïakren ruh bad kiwei pat kiba don bynta ha kane ka kam jngohkai pyrthei namar ka kam jngohkai pyrthei ka dei ka kam kaba don bynta lang da kiba bun ki kynhun.
Shuh-shuh u Bah Diengdoh u la ong ba ynda ka kynhun ka la aiti da ka jingthoh sha ka Sorkar, na ka liang ka Sorkar kan sa khmih bniah halor kine ki mat ha ryngkat ka jingïakren bad kiba don bynta ha kane ka kam naduh ka tnad aiñ, ka tnat pulit bad ka tnad kit ka bah bad hadien kata yn sa shim ïa ki rai baroh da ka komiti. Na ka liang u Bah Diengdoh u la ong ruh ba ka Sorkar kam pat pynbna satia ïa ka sngi ne ka tarik na ka bynta ban pynlong sa ïa kawei ka jingïalang hynrei kan ap shwa ïa ka jingthoh na kane ka kynhun bad ka jingïakren ka ban sa long hapdeng ki trai jong ki jaka sah ki nongwan jngohkai pyrthei.
