Bertina Lyngdoh
Ki ju ong ba ka jingkynshew spah ka pynsuk ïa ka lawei ha kiba bun ki liang bad dei na kane ka daw ba bun ngi ïa beh sha ka kamai ban kynshew ïa ka lashai. Ban kynshew ïa ka spah, nyngkong eh, hap ban long kiba koit ba khiah, nangta de bud sa ka jingtrei shitom. Kam long kaba suk ban kynshew ïa ka spah, namar ban lah ban kynshew ïa ka, hap ban minot thop ïa ka kam. La ju don ruh ka jingong, ba lada don ka spah, bun ki lad ki lynti ruh ki plie. Ka dei ruh ba haba don ka spah, ka pynsuk ïa kiba bun ki jingtrei ban pyndep kumjuh ruh ban pynurlong ïa ki jingthmu jingkwah.
Ka jingkynshew spah kumba long lem kiwei ka don ïa ka jingkut kumba ong ha ka ktien nongwei kata ka “Limitations”. Ngi dei ban don ïa ka spah khamtam ban bam ban im. La duk ne riewspah u dei ban don ïa ka. La stad ne bieit ruh u dei ban don ïa ka. Khlem ma ka, long kaba shitom ban im. Hynrei bunsien ka jingdon ïa ka, ka pynklet noh ban pyrkhat jngai khamtam ïa ka jingim sha lyndet. Kum u briew ba tlot ha ka jinglong doh jinglong mynsiem, bunsien ngi sngewthuh bakla ba ka jingdon spah ne ka jingkynshew spah, ka dei ma ka ka ban ai jaka i’u briew ynda na kane ka pyrthei ngin sa leit noh. Hooid ngi donkam ïa ka, hynrei ka jingdon jong ka ka dei ban long kata kaba don jingmut ynda ka jingim jong ngi kan kut. Kum ban shu kren noh, don bun kiba pahuh ha ka spah, hynrei kim nang ban pyndonkam ïa ka lane kim don kata ka mynsiem ïarap kylliang. Ki im da kaba pynlutphut ïa kane-katai, khlem pyrkhat pat ba lada ka lah ban long jingïarap lem khamtam i’u duk i’u suk lane uba shitom, uba thngan, uba sliang, uba don ha tmier ka jingïap, katno tam kan long ka jingkyrkhu ïa u bad ka spah bneng ruh kumjuh. Bun ngi klet ban pyrkhat ïa kata. Pynban ngi sngew ba ka spah ka dei ka jingim bymjukut ïa ngi.
Namarkata, to kynmaw ba ka jingkynshew spah ha pyrthei kata ka kynshew khwan lalot kam long satia ka ban pynkmen ïa ngi khamtam ha ba ki sngi jong-ngi ki la nang jan. U briew haba u wan lyngkhuit u leit ruh lyngkhuit. Na kane ka daw lada ngi ïa sam lem ïa ka spah kaba ngi la kynshew khamtam eh bad u duk u suk, ne u ba donkam ïa ka, katno tam kan long ka spah bneng ïa ngi. Uba ïa sam lem ïa ka spah, u ïoh ïa ka khet bneng. Ka jingïasam lem kam dei tang ïa ki riewkhuid, hynrei ka dei ruh ïa ngi ki riewpaidbah.
