Nongpoh, Risaw 20
U Skhemlang Suba bad ka Filinza Hansapi ki la long ki nongjop ha ka jingïakop mareh kaba 5 kilometer ïa kaba la tip kum ka ‘Fit India Swacchta Freedom Run 5.0’ kaba long shi bynta ban pynshlur ïa ki paidbah ba kin mareh ban ïoh ïa ka jingkoit jingkhiah.
Ïa kane ka jingïakop mareh kaba la long ha ka step jong ka sngi Saitjaiñ, la pynlong da ka shlem treikam u District Sports Officer ka Ri Bhoi District ha ryngkat ka jingkyrshan lang da ka shlem treikam u Deputy Commissioner ka Ri Bhoi District.
U Skhemlang uba na Paham Damu u la lah ban pyndep ha ka 15:22 sekhon. Ïa ka kyrdan ba-ar la ïoh da u Monas Bongrung (Paham Damu) hadien ba u la lah ban pyndep ha ka 15:56 sekhon bad ïa ka kyrdan balai la khur da u Jemon Makri (Mawryngkan) uba la lah ban pyndep ha ka 16:20 sekhon.
Haba phai sha ka liang ki kynthei, ka Filinza kaba na Nongpoh ka la lah ban pyndep ha ka 20:47 sekhon, ïa ka kyrdan ba-ar la ïoh da ka Juliana Bongrung (Nongpoh) kaba la pyndep ha ka 21:09 sekhon bad ïa ka kyrdan balai la ïoh da ka Rinalis Ingty (Nongpoh) kaba la pyndep ha ka 21:25 sekhon.
I Kong Edwina Nongrum na Umktieh i la long ka nongmareh kaba rangbah napdeng ki kynthei ha kane ka jingïakop ha kaba i la lah ban pyndep ha ka 27:25 sekhon.
Ïa kane ka jingïakop mareh kaba la sdang na Ri Shat Sngi (Orchid Resort) kaba ha Umïam haduh Meghalaya State Fisheries Research & Training Institute kaba ha Mawpun Kshaid, la plie da kaba kaweh lama na u MLA ka Umroi Constituency, u Bah Damanbait Lamare ha ka jingdon ryngkat u District Sports Officer ka Ri Bhoi, u Bah Bobby L. Nongbet lem bad kiwei kiwei.
