Aizawl, Risaw:
Wat lada ki la don ki jingïakhih pyrshah jong ki trai kali kamai, u Myntri Rangbah jong ka Mizoram, u Lalduhoma, u la ong ba ka sorkar jylla, kan ym pynduna ïa ka dor jong ki umphniang kali, hynrei kan bteng ïa ka dor ba la buh, kaba la pynkiew naduh u bnai Nailur.
Ha ka jingïakren bad ki nongthoh khubor ha Aizawl ha ka sngi Palei, u Myntri Rangbah u la ong ba ka jingïalang jong ka kynhun ki Myntri kaba la long ha ka sngi Balang, ka la pyntikna biang ba ka dor ba la buh jong ka Petrol bad Diesel, kaba la treikam naduh ka 1tarik, Nailur, kan ïai bteng na ka bynta ban pyndonkam.
U la ong ba ka jingpynkiew jong ka sorkar ïa ka khajna VAT ka la long ha ka Petrol na ka 5.23% sha ka 10% bad ha ka Diesel na ka 16.36% sha ka 18%, kaba la treikam naduh ka 1 tarik, Nailur. Nalor ka jingpynkiew ïa ka VAT, ka sorkar ka la buh ruh ïa ka khajna kaba thymmai kaba long T.2 ha ka 1 litar ha baroh ar tylli ki jait umphniang kali kata ha ka Petrol bad ka Diesel na ka bynta ka jingkyntiew ha ka imlang- sahlang bad ki jingshakri ha kane ka bynta, ha ryngkat kane la pynkiew T.2 ha ka 1 litar na ka bynta ban maramot ïa ki surok, u la ong.
Da ka jingpynkiew ïa ka VAT bad ka jingpynkiew khajna, ka dor jong ka Petrol ka la kiew na ka Rs. 93.93 haduh Rs. 99.24 ha ka 1 litar bad ïa ka Diesel naduh Rs. 82.62 haduh Rs. 88.02 ha ka 1 litar.
U Myntri Rangbah ka jylla u la kyntu ïa ki paidbah khamtam ïa ki trai kali kamai ba kin ïaleh ban sngewthuh ïa ka jingthmu jong ka sorkar kumba la pynpaw namar ba kane ka jingkiew dor ka long na ka bynta ka jingbha jingmiat bad jingmyntoi jong ki paidbah.
