Jowai, Risaw 21
Ka Nangbah Mulang ka la lah ban pynthikna ban jam sha ka quarter final ha ka lympung ïalehkai 8th Invitation Knockout Football Tournament ba la pynïaid da ka Wahïajer Sports Club, hadien ba ka la lah ban pynliem noh ïa ka Mawryngkneng Sission da 6-0 kol ha ka Sngi Saitjaiñ.
Ha katei ka jingïakhun pre-quarter final kaba la long ha madan Wahïajer Sports Complex, ka Nangbah Mulang ka la lah ban pynpaw ïa ka jingtbit ha kaba la ïoh ban thep kol nyngkong lyngba u Civil Khongmalai ha ka minit kaba 22, u Niponghi Sumer u la thep ar kol ha ka minit 24 & 54, kumjuh u Banshan Pale u la thep ar kol ha ka minit 60 & 75 bad ïa kawei pat la thep da u Suting Syrti (77). Ïa ka nam Man of the Match la ïoh pdiang da u Niponghi Sumer.
Kawei pat ka jingïakhun pre-quarter kan long ha ka 22 tarik ha kaba ka YBSC Shella kan ïakhun pyrshah ïa ka Red Mark FC ha ka por 2 baje nohphai sngi.
