Nongpoh, Naitung 24
Ka Khasi Students’ Union, North Khasi Hills District Unit da ka mynsiem jong ka jingsngewkmen bad sngewsarong ïa ka jaidbynriew hi baroh kawei, mynta ka sngi kala pdiang burom ïa ki ar ngut ki heprit kiba la mihkhmat ïa ka klob Minerva Academy Football Club na ka jylla Punjab ha ka Helsinki Cup 2026 kaba la pynlong ha Finland bad ka Gothia Cup 2026 kaba la pynlong ha ri Sweden.
Katei ka klob kaba kitei ki heprit na ka Jylla ki ïalehkai, kadei kaba la mihkhmat na ka ri India bad ïoh ruh ban khur jingjop ha baroh ar tylli kitei ki lympung ïalehkai phutbol kum ki lahduh ha ka kyrdan jong kiba hapoh 12 snem ka rta. Kine ki heprit kidei u Mekhamkhraw Nongrem bad u heprit Donald Myrthong.
Ha ka jingpynkupburom ka KSU mynta ka sngi ïa kitei ki ar ngut ki heprit ha Nongpoh, la lamkhmat da u Bah Lambok Rymbai, Vice President, u Bah Johny Nongrum Sports Secretary, Bah Baiashanlang Kharshanlor Organising Secretary nalor kiwei de ki nongïalam ka seng. Ha kane ka sngi la ïadon ryngkat ruh da ki bahaïing-hasem kitei ki ar ngut ki heprit kiba la wanrah nam ïa ka Jylla bad ka Ri hi baroh kawei.
