Shillong, Risaw 22
Saw ngut ki ‘rang bad ki ‘thei ïalehkai ka Jylla hapoh ka lama jong ka Meghalaya Athletics Association (MAA) ki la mih na ka nongbah ha ka Sngi Ba-ar ban leit shim bynta ha ka lympung ïalehkai 39th National Junior Athletics Championship 2024 ka ban sdang naduh 25 haduh 29 tarik mynta u bnai ha Bhubaneshwar, Odisha.
Kine ki kynthup ïa u Rikangku D Sangma (U-14), ka Rukini RT Dkhar (U-16), ka Anrisha Klein (U-20) bad u Donbok Shabong (U-20) ha kaba la ïalam da u Coach & Manager u Pleasantly Synnah, uba dei u Athletic Coach jong ka tnat ïalehkai ka Sorkar Jylla.
Ha katei ka lympung u Rikangku yn shim bynta ha ka Kids Javelin & Triathlon B, kumjuh ka Rukini kan shim bynta ha ka 600 mitar, ka Anrisha ha ka High Jump bad u Donbok ha ka 400 mitar.
Lah ban kdew ba ha ka 35th East Zone Junior National Athletics Championship 2024 kaba la kut dangshen, u Rikanku Sangma u la khur ïa ka takma rupa ha ka Kids Javelin bad ka la wan bsaw ha ka Triathlon B. Te kumta la khmih lynti ba un lah ban ïalehkai ha kane ka National Junior Competition.
Ka Anrisha Klein ruh ka la khur ïa ka takma rupa ha ka High Jump, u Donbok Shabong ruh u la khur ïa ka takma ksiar ha ka 4X 400M Mixed relay bad u Rukini Dkhar u la wan ha ka kyrdan basaw.
Kumba ka paw dei tang kitei ki khynnah kiba la ïoh rung kat kum ka jingpyllait da ka Athletics Federation of India kiba lah ban shim bynta na Meghalaya sha katei ka 39th Natiional Junior.
Kumta na ka liang ka MAA ka la ai khublei kitbok ïa kitei ki khynnah ba kin ïalehkai bha khnang ba kin lah ban ïalehkai bad ba kin lah ban khur takma na ka bynta ka Jylla ha katei ka lympung.
