Aizawl, Risaw:
U Myntri ka tnat ki kam poh ïing jong ka jylla Mizoram u K. Sapdanga u la maham tyngeh ïa ka Mizoram Commercial Vehicle Union (MCVU) bad la kyrpad ïa ki nongbat Plying Permit ba la ai da ka State Transport Authority ba kin bishar biang ïa ka jingkular jong ki ban bud ryntih ïa ka hukum jong ka STA; bad la pynpaw ba lada kim lah ban pyndep ïa ka jingkular jong ki, ka sorkar kam don daw ban ïai pynskhem ïa ka Permit jong ki.
Ki heh jong ka tnad Transport bad ki heh jong ka tnad pulit ha ka sngi Ba-ar ki la ïakynduh ïa u Sapdanga bad ki la pynpaw ba wat lada ka MCVU kam weng noh ïa ka jingïakhih jong ki, yn sa pynbeit da kumwei pat khnang ban pynsuk ïa ka leit ka wan jong ki paidbah. U Sapdanga u la pynpaw ba ki SP ha man la ki distrik kin pynbeit katba lah ïa ki pulit ban don ha ka Duty bad ki pulit ka Batallion katkum ka jingdonkam, bad ba ki Mizoram State Transport kin sa ïaid ha ka nongbah ha ka jaka jong ki bus jong ka nongbah.
Shuh shuh u la bynrap da kaba ong ba kiwei pat ki kali kiba kit ïa ki nongleit jingleit ki bym ai jingkyrshan ïa ka jingïakhih kin shah pynbiang da ki lad ai jingïada; bad lada ka MCVU ka ïaid shakhmat bad ka jingïakhih, yn shah ïa baroh ki kali ar shaka bad saw shaka kiba kamai ban ïaid ha Aizawl khlem da bud ïa ka kyndon odd-even number.
