Guwahati, Risaw:
“Ka jingbishar bahok kan long”, la ong u MP ka Congress Lok Sabha, u Angomcha Bimol Akoijam, shabar ka kad liengsuiñ jong ka Imphal, ha ka sngi Palei, hashwa ba un leit sha New Delhi ban ïadon bynta bad ka jingtohkit jong ki pulit jong ka Delhi, halor ka jingkynnoh leh donbor pyrshah ïa u ha Jawaharlal Nehru University (JNU).
Katba ki nongkyrshan ki dang pynmih ïa ki jingpyrta kum ka jingïatylli bad u, u Akoijam u la ong ha ki lad pathai khubor, “Nga leit shata namar ba ka don ka jingkhot pulit. Wat khuslai, ka hok kan sa long…Kane ka dei ka jingsdang ban pynduh pyndam ïa baroh ki jingbymhok kiba ki briew jong nga ki la ïakynduh ha kine ki phew snem. Ka jingbishar bahok kan sa long bad ka jingïakhun pyrshah ïa ka jingbishar bymhok kane ka dei ka jingsdang. Ngan sa ïakhun pyrshah ym tang ïa ka jingbishar bymhok ba la long pyrshah ïa nga hynrei da ki phew snem jong ka jingshitom kaba ki briew jong nga ki la ïakynduh.”
Ki pulit ka Delhi ki la khot tohkit ïa u ha ka sngi Palei hadien ba la ujor ïa ka ejahar pyrshah ïa u ha ka 11 tarik, Risaw ha thanat Vasant Kunj North. Ïa kane ka ejahar la ujor halor ka jingujor jong u heh ophisar pahara jong ka JNU hadien ka jingkynnoh jong ki samla pule.
Ki jingkynnoh ki dang don ha ka jingtohkit, bad ka jingkhot hajir ka dawa ïa u ban ïadon bynta lang ha ka jingtohkit.
Ka JNU ka la weng kam ïa u Akoijam ha ka 9 tarik u Risaw, kaba u la khot ka “jingthwet ïa ki nongleh jadu” bad ka la buh jingkylli hato la bud ïa ka rukom treikam kaba dei.
Ki nongkyrshan jong u MP ka Congress, u Akoijam, ha ka 14 tarik Risaw, ki la pynlong ïa ka jingïakhih habar jong ka ophis treikam jong ka BJP ha Keishampat ha Imphal, da kaba kynnoh ba ki bor saiñ pyrthei, ki la thmu ïa une u nongmihkhmat, hapdeng ka jingïakynad halor ka jingkynnoh ba la leh donbor pyrshah ïa u.
Ki nongïakhih ki la ïaid paidbah na ka ïing sah jong u Akoijam ha Keishamthong sha ka jaka treikam jong ka seng BJP, da kaba pyrta ïa ki kyntien kum “Down Down BJP”, “We Support Oja Bimol” bad “Justice for Oja Bimol”.
Ki bor pahara ki la pynsangeh ïa kane ka jingïaid paidbah hajan Keishampat Junction bad hakhmat ka ophis jong ka BJP.
La pynkynriah ïa ka kynhun pulit kaba heh ban pynneh ïa ka suk ka saiñ namar ki nongïakhih ki la pynlong ïa ka jingïakhih shabar ka jaka treikam jong ka seng shwa ban ïapra.
Ki nongïakhih ki la buh jingkylli ïa ka nongrim jong ka BJP halor ka jingïakynad ha kaba ïadei bad ka jingkynnoh pyrshah ïa u Akoijam, kiba la khring ruh ïa ka jingpyrkhat hadien ka jingpynshitom da ki bor pynïaid jong ka Jawaharlal Nehru University (JNU).
Katkum ki khubor, ym duna ïa ki 11 ngut ki samla pule kynthei ki la mudui ha u bnai Jymmang. Ki nongïalam ka BJP, ki la dawa ban iehnoh kam ïa u, bad la ïathuh ba u Myntri Rangbah ka jylla, u Yumnam Khemchand Singh, u la pyrta ïa kajuh ka jingkhot. Ki nongkyrshan jong u ki la pynlong ïa ki jingïalang ha Imphal da kaba khot ïa katei ka jingkynnoh kum ka jingthmu ban pynsngap jar ïa u.
