Kolkata, Risaw:
Ka Myntri Rangbah jong ka West Bengal, ka Mamata Banerjee, ka la kyntu ïa ka sorkar Bangladesh, ba ka dei ban pyllait noh ïa ki 84 ngut nongtong dohkha, kiba na ka jylla jong ka.
Kine ki nongtong dohkha ki la shah set patok namar ba ki la shah pynngat ha ki kyndon aiñ namar ka jingleit tam ïa u International Border. Haba kren ha State Secretariat, ka Banerjee ka la pynpaw shai halor ka jingïadei kaba skhem jong ka India bad ka Bangladesh. Ka la batai ba kumno ki ar tylli ki lieng tong dohkha dang shen ki la rung sha ki bynta jong ki um kiba hap hapoh ka Bangladesh, kaba la pynlong ïa ka jingshahkem jong ki 36 ngut ki nongtong dohkha.
“Ngi dang ïaid shakhmat ban leh ei ei katkum ka aiñ,” ka la ong, da kaba pynksan ïa ki jingpyrshang ban pynbeit ïa kane ka jingeh. Ka Myntri Rangbah ka la ban jur halor ka jingdonkam ban pynneh ïa ka jingïadei kaba bha bad ki ri ba marjan. “Ka Bangladesh ka dei ka paralok jong ngi. Ngi kren ïa kajuh ka ktien, ngi bam ïa kajuh ka jingbam bad ngi phong ïa kajuh ka riam,” ka la ong.
Ka Banerjee ka ngeit ba kum kine ki jingïadei ki ïarap ban weng ïa ki jingeh kham kloi katba lah bad kaba jop. Ka la kdew ruh ba ki jingkylla ha ka kam saiñ pyrthei ki long ki bym lah ban kiar hynrei ka la pynpaw ka jingkyrmen ba ka jingïadei kan nangbha shuh shuh.
“Ki don ki jingïakynduh jingeh ha ki kam saiñ pyrthei, hynrei nga kyrmen ba ka jinglong jingman kan sa bha biang,” la ong ka Banerjee, da kaba pynpaw shai halor ki jingdonkam jong ka jingïadei hapdeng ki ri kiba ïasamlang ïa u pud u sam. Ki nongtong dohkha ki la shah maham ha ki kynhun seng jong ki nongtong dohkha ba kim dei ban rung beaiñ sha ki bynta jong ki ri ba marjan khamtam kum ha kine ki por ba dang mih ki kynrum-kynram ha ka synshar-khadar.
