New Delhi, Risaw:
Katba ka ‘erïong Dana ka la poi ha ki bynta rudnong jong ka Odisha, ha kaba la khmih lynti ba kan sa hiar ryngkew mynta ka sngi ka 25 tarik, Risaw, ka jylla ka dang pynkhreh ban pynkynriah jaka ïa kumba 10 lak ngut ki briew na ki katto katne ki distrik kiba don ha ki rudnong. Ha kajuh ka por, ki la don palat 1.14 lak ngut ki briew ha West Bengal kiba la shah pynkynriah noh sha ki jaka sah shipor kum ka lad jingïada.
U Myntri Rangbah jong ka Odisha, u Mohan Charan Majhi, uba la khmih bad bishar bniah halor ki rukom pynkhreh jong ka sorkar jylla, u la ong ba tang 30 percent ki briew, lane kumba 3-4 lak ngut ki briew kiba sah ha ki jaka ba la shah ñiew kum ki jaka ba don jingma ne ka ‘Danger Zone’, ki la shah pynkynriah haduh ka janmiet jong ka sngi Balang. Ka ‘erïong Dana, ïa kaba la antad ba ka jingstet jong ka lyer kan poi sha ka 120 Kmph (75 mph), ka lah ban lynshop hapdeng ka Bhitarkanika National Park bad Dhamra Port ha Odisha haduh ka step jong ka sngi Thohdieng, kata mynta ka sngi, la ïathuh ka India Meteorological Department (IMD).
Ka ‘erïong ‘Dana’, ïa kaba la sdang na ka thaiñ Mihngi-marpdeng jong ka Bay of Bengal ha ka sngi Balang, ka la wanrah ïa ka jinghap jong u slap uba jur ha ki ba bun ki distrik jong ka thaiñ ba shaphang Shathie jong ka West Bengal, kynthup ïa ka Kolkata, la ong ka IMD. Ka Eastern bad ka South Eastern Railways ka la pynsangeh treikam ïa bun tylli ki rel ha ka 24 tarik, Risaw bad ka 25 tarik, Risaw, namar ka jingdon jong kane ka ‘erïong. Ka ‘erïong ka lah ban nang jur shuh shuh ha ki bynta ba shaphang Shatei-Sepngi jong ka Bay of Bengal.
Ka ‘erïong Dana, ka la beh ha ka jingstet kaba 420 km shaphang Shatei-lam-Mihngi jong ka Paradip, 450 km shaphang Shathie-Shathie-Mihngi jong ka Dhamara bad 500 km shaphang Shathie-Shathie-Mihngi jong ka Sagar Island ha ka por 8.30 mynstep ha ka sngi Balang, la ïathuh shuh shuh ka IMD. Ki jingleit jingwan jong ki jhad ha ki thaiñ Sunderbans kiba sha kylleng ki jaka jong ka North bad South 24 Parganas distrik bad kumjuh ha shilynter ka wah Hooghly ha Kolkata bad ki jaka ba marjan kin dang bteng ha ka jingsangeh treikam namar ka jingthut ka suiñbneng. Ka Kolkata Municipal Corporation ka la plie ïa ka Control Room ha ki jaka treikam jong ka ha Kolkata bad khang pyrshah ïa ki nongtrei ba kin shim shuti khnang ban lah ban pynïaid beit ïaid ryntih ïa ki kam ha ka por ba donkam kyrkieh.
Ka tnad bor ding jong ka Odisha ka la pynbna ïa ki Helpline Number 8900793503, 19221 (WBSEDCL) bad 1912 (CESC) na ka bynta ki riewpaidbah lada donkam kyrkieh. U Myntri Rangbah u la ong ba palat 30 percent na ki 10 lak ngut ki briew la pynkynriah noh sha ki jaka ba shngaiñ bad lait na ki jingshlei um naduh ka janmiet jong ka sngi Balang namar ka jingkhie ka ‘erïong Dana.
Ka sorkar ha ka Sngi Balang ka la buh thong ban pynkynriah ïa 10,60,336 ngut ki briew na ki 14 tylli ki distrik. Ka tnad MeT ka la buh jingmaham halor ka jinghap jong u slap uba jur haduh katta katta ha ki jaka ba kham jngai ha North bad ha South 24 Parganas, Purba bad Paschim Medinipur, Jhargram, Kolkata, Howrah bad Hooghly distrik ha ka 24 tarik bad ka 25 tarik, Risaw.
Ki la don palat 170 tylli ki rel Express bad ki rel Passanger kiba ju ïaid lyngba ka South Eastern Railway (SER) ki la shah pynsangeh treikam namar ka jingsngewthuh ba kan sa jur ka jingkhie ka ‘erïong, la ïathuh ka tyllong khubor kumba la kren da uwei na ki heh sorkar u bym shym kwah ban pynpaw kyrteng. La pynsangeh treikam ruh ïa ki liengsuiñ kiba treikam ha Netaji Subhash Chandra Bose International Airport ha Kolkata na ka bynta 15 kynta kaba la sdang naduh ka por 6 baje janmiet jong ka sngi Palei kum shi bynta ban wanrah ki lad jingïada na ka jingwan jong ka ‘erïong.
Katkum ka jingong jong ki bor pynïaid jong ka kad liengsuiñ, la ong ba ka jingtreikam jong ki liengsuiñ kan sa shah ktah naduh ka por 6 baje janmiet jong ka 25 tarik, Risaw haduh ka por 9 baje mynstep jong ka 26 tarik, Risaw. Shuh shuh, la ong ba ka sorkar West Bengal ha ka sngi Ba-ar ka la pynbna ba ki skul bad ki jaka pule, kin khang shwa ha kiba bun ki bynta jong ka jylla.
Ka jingpynbna ba la pynmih da ka tnad pule puthi jong ki skul jong ka sorkar West Bengal ka la ong ba yn pynsangeh shwa ban pynlong skul ha ki hynñiew tylli ki distrik kiba kyntup ha South 24 Parganas, North 24 Parganas, Purba Medinipur, Paschim Medinipur, Jhargram, Bankura, Hooghly, Howrah, bad Kolkata naduh ka 23 tarik, Risaw haduh ka 26 tarik, Risaw.
Ha Odisha, baroh ki jaka pule, kynthup ïa ki skul, ki kolej bad ki skulbah, kin dang khang ha ki 14 tylli ki distrik haduh ka 25 tarik, Risaw, kaba la long hashwa ka jingwan hiar ryngkew ka ‘erïong Dana. Ka kynhun National Disaster Response Force (NDRF) ka la phah haduh 56 tylli ki kynhun ha ki san tylli ki jylla, kynthup ïa ka Odisha bad West Bengal, ha kaba ïadei bad ka ‘erïong Dana.
