Shillong, Risaw 24
Ka lahduh jong ka aïom ba la dep, ka Mawlai SC ka la bteng ïa ka jingjop ba ar ha ka Shillong Premier League hadien ba ka la lah ban pynliem noh ïa ka Ryntih FC da 4-1 kol ha ka Sngi Palei, katba ka Rangdajied United FC kaba long ka lahduh jong ka Meghalaya State League 2023, ka la shah rem noh ha ka Shillong Lajong FC da 1-2 kol.
Kane ka nam jop jong ka Mawlai ka la wan urlong lyngba ka hat-trick na u Khrawkupar Jana bad ïa kawei pat kol la pynbud da u Donlad Diengdoh na ka bynta ban pynlong ïa katei ka kynhun hapoh ka jingïalam u Bah Hering Shangpliang ban ïoh 6 point na ki ar sien ïakhun.
Kumba ka paw katei ka jingïakhun ka la long kaba ïakhaid bha naduh kaba sdang ha kaba ym shym la don ba lah ban thep kol ha ka kylla step. Hynrei tang hadien 3 minit ba la bteng ïa ka kylla miet ba ka Mawlai ka la ïoh ban pynkhih jar nyngkong eh lyngba u Kharawkupar. Une u rangïalehkai shakhmat u la pynbud biang ïa ka kol ba ar ha ka minit kaba 51 na ka bynta ban tam 2-0 kol.
Hadien katto-katne por u Khrawkupar u la thep biang ïa ka kol balai ha ka minit kaba 80 na ka bynta ban ïoh syndon ïa ka hat-trick. Hadien 7 minit ka Ryntih ka la lah ban pynphai kylla shi kol lyngba u Allen L. Nongbri ha shwa ba ka Mawlai kan thep biang ïa ka kol kaba khatduh lyngba u Donlad Diengdoh (89) na ka byna ban jop syndon.
Ha ka jingïalehkai kaba bud, u Samchaphrang Lato (26) bad u Emanbha Marba-niang (80) ki la ïoh ban thep kol na ka bynta ka Lajong bad u Benny V. Khriam (54) u la lah ban pynphai kylla na ka bynta ka Rangdajied, kaba la mad ïa ka jingshah rem ba ar ha kane ka lympung kata ha ka Mawlai ha ka jingïakhun kaba nyngkong.
Kane ka lympung kan bteng biang ha ka 28 tarik ha kaba ka Laitkor SC kan ïakynduh pyrshah ïa ka Sawmer SC ha ka por 5:30 janmiet.
