Guwahati, Risaw:
Ka seng Aam Aadmi Party (AAP) ka la rung sha ka jylli jong ka jingïakhun ha ka ilekshon shiteng samoi jong ka Assembly ha Assam, ha kaba kane ka la pyni ïa ka jingthmu ban nang pynïar bad pynkhlaiñ shuh shuh ïa ki jingtreikam jong ka seng ha ka kam saiñ pyrthei ha ka jylla ba shaphang Shatei-lam-Mihngi.
Hadien ba la pynbna ïa ki tarik jong ka jingthep vote, ka seng ka la pynkloi ban thaw ïa ka kynhun jong ki 7 ngut ki dkhot ki ban khmih bniah ïa ki kam ba ïadei bad ka ilekshon bad kumjuh halor ka jingpyntreikam ban jied ïa ki kyrtong.
U President jong ka seng AAP ha Assam, u Manoj Dhanowar, ha ka jingai jingkren jong u, u la ïasam ïa ki jingmut halor ka jingpynkhreh, ha kaba u la pynpaw ba ka jingsngewtynnad ban ïakhun ha ka tiket jong ka seng ka ïaid shabar jong ka kyrdan jong ka hi.
“Ym tang ki dkhot jong ka seng AAP hynrei wat kiwei kiba na kiwei pat ki seng ki la pynpaw ïa ka jingkwah ban mihkhmat na ka bynta jong ngi,” ong u Dhanowar, ha kaba pynpaw ïa ka jingpynkylla ïa ka saiñ hima sima kaba nang kiew katba nang jan sha ka ilekshon.
Haba la sakhi ba la don ha ka jaka ba skhem ha Delhi bad Punjab, mynta ka seng AAP ka buh jingthmu ban khmih bniah sa ha ki thaiñ kum ka Haryana bad Assam ban nang kiew shuh shuh.
La khmih lynti ba ka seng kan sa pynbna shen ïa ki kyrteng jong ki kyrtong jong ka na ka bynta ka Behali, Dholai, bad Samaguri konstitwensi ki ban ïakhun ha ka ilekshon.
Kane ka jingïakhun ilekshon kan kynthup ïa baroh san tylli ki konstitwensi kata ka Behali, Bongaigaon, Dholai, Samaguri, bad Sidli, ha kaba ka jingthep vote kan long ha ka 13 tarik, Naiwieng bad ka jingñiew vote kan long ha ka 23 tarik, Naiwieng.
