Shillong, Risaw 25
Ka lympung ïalehkai Third Division Football Tour-nament 2024 ba la pynïaid da ka Tyrsad Area Sports Association (TASA) ka la nangjam shaphrang ha kaba ka Wahnongkseh SC bad ka Kyiem SC ki la ïoh jingjop ha ka sngi Thohdieng.
Ha kane ka jingïakhun kaba la long ha madan Tyrsad, ka Wahnongkseh ka la pynliem noh ïa ka Lawkhla Mawlong SC da 3-0 kol. Ïa kine kol la thep da u Almotoris Shabong ha ka minit kaba 43, kumjuh u Kyrshanlang Shabong (46) bad u Mardon Nongbri (50).
Ha kawei pat ka jingïakhun, ka Kyiem ka la jop da 3-0 kol ïa ka Dewiep SC. Kane ka nam jop ka wan urlong lyngba u Estar Kharshandi uba la ïoh thep kol ha ka minit kaba 8, kumjuh u Johnstar Warjri (52) bad kawei pat da u Annybhabok Ryntathiang (64).
Haba phai sha ka jingïakhun jong ka Second Division hapdeng ka Phanniewlahrum SC bad ka Mawliehpoh SC ki la ïasam mar shi point hadien ba kim shym la lah ban thep thep kol haduh ba kut ka jingïalehkai.
Ka jingïalehkai jong ka Third Division kan bteng biang ha ka 28 tarik ha kaba ka Mawtyngngor SC kan ïakhun pyrshah ïa ka Mawsadang SC ha ka por 12 baje bad ka Mawsawrit SC ïa ka Tyrsad Umkseh SC ha ka por 2 baje janmiet, katba ïa ka jingïakhun jong ka Second Division yn pynlong ha ka por 3:30 janmiet hapdeng ka Nongmadan SC pyrshah ïa ka Phanniewlahrum SC.
