New Delhi, Risaw:
U Myntri Rangbahbuh u Narendra Modi, u la pynbna ïa ka bailutksan kaba `. 2 lak sha man ki bahaïing-bahasem jong ki lanot kiba la ïap na ka jingtwa bad jingkhyllem jong ka ïing kaba dang shna, ha ka thaiñ Horamavu Agara jong ka bynta ba shaphang Mihngi jong ka Bengaluru, kaba la jia ha ka Sngi Ba-ar.
Ka jingthoh kaba la buh ha ka rynsan X na ka shlem treikam jong u Myntri Rangbahduh, ka thoh kumne, “Nga sngewsih namar ka jingduh noh ïa ki mynsiem briew namar ka jingtwa jong kawei ka ïing ha Bengaluru. Ki jingpyrkhat jong nga ki don bad kito baroh kiba la duh noh ïa kiba ïeid ba thoiñ jong ki. Nga duwai ba kiba mynsaw kin ïoh noh kloi ïa ka jingkoit.
“Yn ai ïa ka bailutksan kaba `.2 lak na ka PMNRF sha ki bahaïing-bahasem jong kito kiba la ïap na ka jingjia. Na ka bynta kito kiba mynsaw na ka jingjia yn ai mar `. 50,000.”
Ha kajuh ka por, la ïathuh ba hadien ba la lap shuh shuh ïa ki metïap, ka jingïap jong ki briew ha ka jingjia ka la kiew sha ki phra ngut.
Kiba la mynsaw ki dang shah sumar ha Bengaluru North Hospital, katba uwei pat u don ha Hosmat Hospital.
Ka la don ka jingujor ejahar ha Hennur Police Station pyrshah ïa ki lai ngut ki briew ïa kiba la tip kyrteng kum u Munirajareddy, u Mohan Reddy, bad u Elumalai, ha kaba ïadei bad katei ka jingtwa jong katei ka ïing.
Kine ki briew kin shah pynngat ha ki kyndon bapher-bapher jong ka BNS bad ka Real Estate (Regulation and Development) Act.
U Bhuvan Reddy uba dei u khun jong u Munirajareddy ha kaba ka kyrteng jong u ka la paw kum u nongshna ïa kane ka ïing, u la shahkem noh.
U kontraktor u Muniyappa uba la kitkhlieh ban shna ïa kane ka ïing kaba saw mala ruh u la shah kem na ka bynta ban shah tohkit, la ong u DCP East u D Devaraja. Ha kaba ïadei bad kane ka jingjia, u Symbud Myntri Rangbah ka Karnataka u DK Shivakumar u la pynpaw ïa ka jingsngewkhia bad ka jingangnud ban ai jingïada bad khanglad ïa kum kine ki jingjia ba sngewsih nangne shakhmat.
“Ka long ka jingjia kaba sngewsih shibun. Nga pynpaw ka jingsngewsih na ka bynta jong ki… Nga la bthah ba hangno-hangno ha Bengaluru ba don ka jingtei kaba pyntreikam khlem kano-kano ka license kaba biang, yn pynsangeh noh ban pyntreikam. Ngi wan shakhmat na ka bynta ban wanrah ïa ki kyndon ba baroh kito kiba shim ïa ka license, ki dei ban don ïa ka jingpynshisha lyngba ki syrnot, lym kumta kin sa shah pynshitom da kaba tyngeh,” la ong u Shivakumar.
