Vijayawada, Naiwieng:
Haba kren sha ki heh sorkar lyngba ka teleconference ha ka sngi Balang, u Myntri Rangbah ka jylla Andhra Pradesh u N Chandrababu Naidu u la ong watla ki erïong Arnab bad Murasu ki la ktah ïa ka jylla ha ka jingbuddien kaba stet ha kane ka aïom, hynrei ka tnad rep ka la mad ïa ka jingduhnong kaba khraw.
“Na ka bynta ka aiom Kharif mynta u snem, ngi la pynbna ïa ki 22 jait ki jingthung na ka bynta ka Insurance, na kine, ngi dang pyntreikam ïa ka Yield-based Insurance na ka bynta 15 tylli ki jingthung, katba ïa ki hynriew tylli ki jingthung ba dang sah la pynbiang ïa ka Insurance katkum ka suiñbneng,” u la ong.
U Myntri Rangbah u la bthah ïa ki ophisar jong ka tnad Agriculture ba kin pynthikna ba ka Crop Insurance kan long kum ka jingda ïa ki nongrep bad ki nongrep ba shong wai na ka jingduhnong na ka jingshah pynjulor ha ka mariang.
U la ban jur ïa ka jingdonkam ban pynlong ïa ki prokram pynsngewthuh shaphang ka jingpynbiang ïa ki jingthung bad ban ai ïa ki jingbthah kiba shai ha ka kyrdan jong ka lyngkha.
U Naidu u la ong ba namar ki sienjam ba la shim da ka sorkar jylla, ka jingpynrung kyrteng ïa ki nongrep hapoh ka jingïada ïa ki jingthung ka la kiew bha.
Ka Andhra Pradesh ka don ha ka kyrdan kaba hynriew ha ka ri ha kaba ai ïa ka jingïada ïa ki jingthung jingtep. “Mynta u snem, ngi la ai ïa ka insurance na ka bynta ki jingthung ba la rep da ki 17.07 lak ngut ki nongrep.
U khaw, u dai, ki shana budam, u kynphad bad u riewhadem ki don 90 percent na ka jaka ba la buh insurance baroh.
Ka bynta kaba kongsan jong ka jaka rep kba ka don ha ki 16 tylli ki distrik kiba la shah ktah ha ka erïong,” u la bynrap.
U Myntri Rangbah ka jylla u la ong ba ka sorkar ka ai Input Subsidy sha ki nongrep. Haba ki nongrep ki ïoh ïa baroh ar ka Insurance jong ki jingthung bad ka jingïarap na ka bynta ki mar rep, ki lah ban ïoh biang ïa ki jingbei tyngka jong ki bad ïoh ïa ka jingshngaiñ ha ka liang ka pisa tyngka.
Ki heh jong ka tnad rep ki dei ban pynthikna ba ka jingsiew bai lutksan kan poi sha baroh ki nongrep kiba la siew ïa ka bai Insurance jong ki. Ym don u nongrep uba dei ban mad ïa ka jingduhnong, u la ong.
U Myntri Rangbah u la ong ba ki nongrep ki lah ban mad ïa ka jingduhnong kaba khraw lada ym lah ban pynbeit bha ïa ki jingdawa Insurance jong ki jingthung. “Baroh haduh 30,286 tylli ki Crop Cutting Experiment (CCE) kiba donkam ban leh, ïa kine dei ban pyndep bad ban pynbiang hapoh u bnai Naiwieng.
Ki Cyclone ki ju jia ha ka jylla shisien man la ka ar snem bad teng teng shisien man la ka san snem.
Namar kine ki jingjia ba sngewsih jong ka mariang, ki nongrep bunsien kim lah ban ïoh biang wat ïa ki jingbei tyngka ba ki la pynlut ha ka rep ka riang.
Lada ngi ai ïa ki nongrep ïa ka jingpynthikna ba kin lah ban ïoh biang ïa ki jingbei tyngka jong ki, kin lah ban jop ïa kum kine ki jingduhnong.
Ka jingpynïadei ïa ki jingai jingïarap ïa ki mar rep bad ka jingpynbiang ïa ki jingthung kan pynthikna ïa ka jingmyntoi kaba pura na ka bynta ki nongrep”, la ong u Naidu.
U Myntri Rangbah u la pynpaw ïa ka jingpyndonkam kaba nang kiew ïa ka Agri App bad u la bthah ïa ki heh sorkar ban pynïar shuh shuh ïa ka jingpyndonkam ïa ka hapdeng ki nongrep.
“Ki don 47 lak ngut ki nongrep ha ka jylla, na kine 20 lak ngut ki la download ïa ka Agri App. Kumba 10 lak ngut ki nongrep ki ju pyndonkam man ka por. Kane ka app ka ai ïa ki jingshakri bapher bapher, bad ki nongrep ki dei ban pyndonkam kham bha ïa kine ki jingdonkam”, la ong u Myntri Rangbah.
