Bengaluru, Naiwieng:
U Harish Dwivedi uba long u National General Secretary ka seng BJP bad In-charge jong ka seng ha Karnataka u la ong ba ki nongïalam ka seng kin sa treilang na ka bynta ban weng ïa ki jingeh jong ka sorkar BJP ha ka jylla ha u snem 2028. U la kynnoh ba ki nongïalam ka Congress ki “lute,” bad u la ong ba ïa kane la tip da baroh.
U la kynnoh ba ka Congress kam kheiñ snep ïa ka jingmyntoi jong ki paidbah bad ba ka pyrkhat tang ïa ka jingkiew shaphrang jong ki nongïalam jong ka hi bad ïa ka jingmyntoi jong ka longïing Gandhi. Ka BJP, u la ong ba kan rah ïa baroh ki kam kiba ïadei bad ka jingmyntoi paidbah sha ki paidbah ha kine ki sngi ban wan. U la kynthoh ruh ïa ka jingkiew dor jong ka dud bad ka shini.
U Dwivedi ka la ong ba kane ka dei ka jingleit kaba nyngkong eh jong u sha Karnataka hadien ba la thung ïa u kum u State in-charge.
Ha ka lah sngi U Blei, u la ong ba ma u bad u President ka BJP ka jylla u BY Vijayendra ki la pynlong ïa ka jingïalang jong ki nongkitkam ka jylla bad ka jingïalang jong ka core committee. U la ïathuh ba u la ïakynduh ïa u nongïalam ba rangbah bad u Myntri Rangbah barim u BS Yediyurappa uba dei u dkhot jong ka BJP’s Parliamentary Board ha ka sngi Ba-ar bad pan jingmut na u.
Halor ka SIR jong ki electoral roll, u Dwivedi u la ong ba kam ju jia tang ha ka por jong u Myntri Rangbahduh ka ri u Modi, hynrei la ju pynlong na ka por sha ka por naduh ki sngi jong u Jawaharlal Nehru bad ka Indira Gandhi. U la kynnoh ba haba ka Congress ka rem elekshon, ka kynnoh ïa ka ECI, ki mashin EVM bad ka Supreme Court ha ka jaka ban wad bniah ïalade, bad ba kam burom ïa ki tnat treikam jong ka Riti synshar ka ri.
Haba kylli hato ka jingïatreilang hapdeng ka BJP bad ka JDS kan bteng ne em, u Dwivedi u la ong ba kum kine ki rai ki dei kiba la shim da ki nongïalam ba hakhlieh duh jong ka seng. U la ong ba ka jingïateh lok ka “ïaid bha na ka bynta mynta.”
Halor ka jinglong nongïalam jong ka seng ha Karnataka, u la ong ba baroh ki ïatreilang hapoh ka jingpynïaid jong u Vijayendra, bad ba ka seng ka ïaid shakhmat hapoh ka jingpynïaid jong une u nongïalam ka kynhun ki samla.
